Arsenali është bërë skuadra më e fundit e Premierligës që po përqendron përpjekjet e saj të transferimeve në Spanjë, pasi ka pasur sukses të jashtëzakonshëm me Martin Odegaard, Mikel Merino, Martin Zubimendi dhe tani Cristhian Mosquera. Tani “Topçinjtë” i kanë vënë sytë te një nga yjet në ngjitje të La Ligës, i cili po zhvillon sezonin e tij shpërthyes.
Mesfushori krijues i Villarrealit, Alberto Moleiro, ka qenë gjithmonë i konsideruar si një talent i madh që në paraqitjet e tij të para me Las Palmas, dhe disa vite më parë ishte shumë pranë një transferimi prej 25 milionë eurosh te Barcelona, përpara se katalanasit të tërhiqeshin. Edhe pse ai ka lënë përshtypje të mira me Las Palmas gjatë dy sezoneve në La Liga, progresi i tij është rritur ndjeshëm që kur iu bashkua Villarrealit këtë verë për 16 milionë euro.
Sipas The Daily Briefing, Arsenali është i hapur ndaj idesë për ta transferuar Moleiron në janar. Ata mendojnë se skuadrës i duhet më shumë thellësi në repartin ofensiv dhe e kanë ndjekur prej kohësh futbollistin, ashtu siç kanë bërë edhe Manchester City, Liverpool dhe Atletico Madrid.
Arsenali beson se një marrëveshje mund të arrihet për rreth 35 milionë euro me Villarrealin, me mundësinë që në pako të përfshihen bonuset ose një përqindje rishitjeje.
“Nëndetësja e verdhë” nuk ka ndonjë arsye për të shitur gjatë afatit të janarit. Edhe pse ishin shpenzuesit e tretë më të mëdhenj në Spanjë këtë verë, me një investim prej 108 milionë eurosh, Villarreal realizoi një fitim neto prej 6 milionë eurosh duke shitur lojtarë si Alex Baena, Thierno Barry dhe Yeremy Pino.
Moleiro vlerësohet shumë, dhe me Villarrealin që aktualisht është në rrugë të mbarë për t’u kualifikuar në Champions League sezonin e ardhshëm, trajneri Marcelino Garcia Toral nuk pritet ta shohë me sy të mirë largimin e një prej lojtarëve të tij kyç në mes të sezonit. Duke marrë parasysh këto rrethana, nuk do të ishte aspak surprizë që Villarreal të kërkonte një çmim edhe më të lartë.
