Sulmuesi i Real Madridit, Rodrygo Goes, mbetet largimi më i mundshëm me emër të madh nga Santiago Bernabeu këtë verë, por ende nuk ka qartësi se ku mund të përfundojë braziliani. Premier League duket si destinacioni më i mundshëm për të, megjithatë nuk ka aq shumë opsione sa mund të imagjinohet për një lojtar të talentit të tij.

24-vjeçari e ruajti statusin e yllit në fillim të sezonit të kaluar, pavarësisht ardhjes së Kylian Mbappé, por me kalimin e kohës ndikimi i tij u zbeh. Pasi u zëvendësua në pjesën e parë të finales së Copa del Rey, ai nuk luajti më deri në ndeshjen e parë të Kampionatit Botëror të Klubeve kundër Al-Hilal. Edhe pse dha një asist për Gonzalo Garcia Torres, kjo mbetet paraqitja e tij e vetme si titullar në 11 ndeshjet e fundit të Realit.

Arsenal ka qenë skuadra më e lidhur me Rodrygon gjatë muajve të fundit. Megjithatë, pas afrimeve të Noni Madueke dhe Viktor Gyökeres, “Topçinjtë” nuk shihen më si destinacioni i mundshëm për brazilianin, ndërsa Cadena SER raporton se Arsenal tashmë përfundimisht nuk do ta transferojë atë këtë verë.

Tani duket se është Liverpool klubi që ka më shumë gjasa ta marrë Rodrygon. “The Reds” janë në bisedime për Hugo Ekitike pas transferimit me shumë para të Florian Wirtz, por nëse arrijnë ta shesin Luis Diaz, do të krijonin hapësirë në krahun e majtë për një tjetër sulmues të madh dhe do të kishin më shumë fonde në dispozicion.

Vlera e Rodrygos është llogaritur ndërmjet 80 dhe 100 milionë euro javët e fundit, por gjithnjë e më shumë Real Madridi duket në një pozitë të dobët negociuese. Sulmuesi i Brazilit nuk duket se ka vend në formacionin titullar me Xabi Alonson dhe do të ishte një zëvendësues i shtrenjtë e i pakënaqur me rolin e tij. Me pak alternativa konkrete, Liverpool mund të negociojë për ta ulur çmimin.