Trajneri i Arsenalit, Mikel Arteta, ka folur për “Sky Sports News” rreth merkatos së verës dhe ka shprehur kënaqësinë e tij me mënyrën se si klubi ka vepruar në këtë afat kalimtar.
Spanjolli nuk e fshehu vlerësimin e madh për drejtorin sportiv Andrea Berta, i cili sipas tij ka luajtur rol kyç në përforcimin e skuadrës.
Shtatë afrime të reja, përfshirë Eberechi Eze
“Topçinjtë” finalizuan nënshkrimin e tyre të shtatë këtë verë fundjavën e kaluar, duke zyrtarizuar transferimin prej 67.5 milionë eurosh të Eberechi Eze nga Crystal Palace. Ky ishte një nga operacionet më të mëdha financiare të klubit në këtë merkato, që pritet të sjellë risi dhe kreativitet në mesfushë.
Arteta: “Na duhej rifreskim, vepruam në kohë”
“Shumë gjëra kanë ndodhur gjatë verës. Natyrisht, janë larguar edhe disa lojtarë të mëdhenj, ndërsa disa të tjerë kanë qenë të lënduar për një kohë të gjatë. Më pëlqeu shumë mënyra si e menaxhuam këtë merkato,” u shpreh Arteta.
Më tej, ai shtoi:
“Vlerësoj lojtarët e ardhur, personalitetet që kemi rekrutuar, mënyrën si kemi rritur cilësinë dhe thellësinë e skuadrës në të njëjtën kohë dhe, mbi të gjitha, mënyrën si ata janë lidhur dhe bashkëpunuar me ekipin. Mendoj se kishte ardhur koha për të rifreskuar skuadrën. Ne e kërkuam këtë dhe vepruam.”
Lavdërimet për Andrea Bertën
Arteta nuk harroi të përmendte edhe drejtorin sportiv, Andrea Berta, duke e cilësuar si një nga faktorët kryesorë të suksesit në këtë merkato:
“Klubi ishte shumë agresiv, shumë i vendosur. Andrea ka bërë një punë fantastike me stafin e tij dhe jam shumë, shumë i kënaqur me rezultatin.” /GazetaExpress/
