Mikel Arteta beson se Arsenali mundi “skuadrën më të mirë në Europë” pasi fitoi përplasjen e madhe evropiane kundër Bayern Munichut me rezultatin 3-1.

Golat në pjesën e dytë nga Noni Madueke dhe Gabriel Martinelli i dhanë Arsenalit një fitore të fortë, duke e lënë lideren e Premierligës në krye edhe të tabelës së Ligës së Kampionëve.

Jurrien Timber shënoi i pari me kokë për Arsenalin, dhe meqë ish-sulmuesi i Tottenhamit, Harry Kane, nuk arriti të shtonte në kuotën e tij prej gjashtë golash në Emirates, ishte 17-vjeçari i Bayernit, Lennart Karl, ai që barazoi — goli i parë që Arsenali pëson këtë sezon në Champions.

Madueke, i rikthyer pas dy muajsh mungesë për shkak të një dëmtimi në gju, shënoi golin e tij të parë me fanellën e Arsenalit, para se zëvendësuesi tjetër, Martinelli, të përfitonte nga një gabim i portierit Manuel Neuer, duke e çuar në pesë fitore nga pesë ndeshje rekordin e përsosur të Arsenalit në këtë garë.

Duke qenë se të dy skuadrat janë thuajse të kualifikuara për fazën e eliminatoreve, kjo përballje luksoze mund të konsiderohej madje si ndeshja më pak e rëndësishme e javës për Arsenalin, e futur mes fitores 4-1 në derbin ndaj Spurs dhe udhëtimit të së dielës te Chelsea i vendit të dytë.

Por Arteta nuk kishte asnjë dyshim për rëndësinë e kësaj fitoreje të merituar ndaj liderëve të Bundesligës.

“Duhet t’i lavdëroj lojtarët tanë, sepse mendoj se zhvilluan një ndeshje të jashtëzakonshme kundër, sipas mendimit tim, skuadrës më të mirë në Europë,” tha ai.

“Individualisht ishim të jashtëzakonshëm në zgjidhjen e të gjitha sfidave që këto skuadra sjellin në fushë.

“Ata e dinë sa shumë punojmë për t’u përgatitur për çdo ndeshje. E dimë që diferencat janë shumë të vogla. E nisëm javën shumë mirë kundër Spurs, duke fituar këtu në shtëpi. Sot është një fitore tjetër e madhe, por kaq.

“Ka qenë një garë ku kemi qenë shumë konstantë deri tani, por është vetëm fillimi. Jemi shumë të kënaqur me atë që pamë sot.

“Edhe njëherë, energjia që krijuam në stadium, ajo që transmeton skuadra, energjia që sjellim, cilësia me të cilën luajmë — është e pabesueshme. Dhe duhet ta ruajmë këtë, sepse është ende shumë herët.”

Kane pati një mbrëmje të vështirë në terrenin e “armiqve”, duke mos regjistruar asnjë goditje në portë.

Kapiteni i Anglisë tha për TNT Sports: “Ishte një ndeshje e vështirë, siç edhe e prisnim. Ishte një betejë e fortë në pjesën e parë, goxha e balancuar.

“Në pjesën e dytë nuk patëm të njëjtën energji apo intensitet dhe humbëm shumë duele. Është humbja jonë e parë e sezonit.

“Nuk duam të krijojmë panik. Por do të mësojmë me siguri prej saj.”

Trajneri i Bayernit, Vincent Kompany, shtoi: “Së pari duhet ta uroj Arsenalin. Fitorja e tyre ishte e merituar.

“Dolën në pjesën e dytë me më shumë qëllim dhe mprehtësi. Ne thjesht i lejuam të merrnin kontrollin.”