Atletet e Michael Jordanit janë shitur për një shumë rekorde.

“BBC” njofton se këpucët sportive, të veshura nga legjenda e basketbollit në finalet e NBA-së në vitin 1998 janë shitur për 2 milionë euro, një shumë rekorde kjo, përcjell “Gazeta Express”.

Atletet e nënshkruara, të cilat e kishin çmimin nga 2 deri në 4 milionë euro, janë më të shtrenjtat të shitura ndonjëherë nga ish-basketbollisti i Chicagos.

Me ato atlete ai i kishte shënuar 37 pikë në ndeshjen e dytë finale të “play-offit” në fitoren 93:88 kundër Utah Jazz.

Ndërkaq, fanella që e kishte veshur në finalet e NBA-së të vitit 1998 janë shitur në vitin 2022 për 10 milionë euro.

Shitjet e fundit të Jordanit konsiderohen si më të shtrenjtat ndonjëherë nga ndonjë sportist në histori.

Rekordi i kaluar i atleteve të Jordanit ishte rreth 1,3 milion euro për një palë atlete “Nike Air Ships” në vitin 2021.

Jordan është njëri prej sportistëve më të pasur në botë falë bashkëpunimit të tij të kamotshëm me kompaninë e veshëmbathjeve, Nike. /Gazeta Express/