Atletico Madrid duket se do të vazhdojë rindërtimin e skuadrës këtë verë, e para nën drejtimin e drejtorit të ri sportiv, Mateu Alemany.
Duket se mbrojtja e tyre mund të përballet sërish me ndryshime të mëdha këtë verë, pas ardhjeve të David Hancko, Marc Pubill dhe Matteo Ruggeri gjatë këtij viti.
Los Colchoneros tashmë po shikojnë opsione për të zëvendësuar disa nga mbrojtësit aktualë, sipas “RadioMarca”.
Ata po monitorojnë progresin e mbrojtësit të djathtë të Palmeiras, Agustin Giay, të cilin e kanë ndjekur për disa vite dhe që mund të jetë një zëvendësim për Nahuel Molinan, një nga tre mbrojtësit për të cilët Atletico mund të lejojë largime.
Matteo Moretto shpjegon se Atletico do të marrë në konsideratë largimet e Molinës, Clement Lenglet dhe Jose Maria Gimenez këtë verë.
I pari ka pasur vështirësi për të përmbushur pritshmëritë që nga transferimi i tij prej 20 milionë eurosh nga Udinese, dhe Marcos Llorente mbetet zgjedhja e parë në mbrojtjen e djathtë. Molina tashmë ka oferta për të lënë klubin.
Sa i përket Gimenez, është raportuar se Atletico ka rënë dakord për largimin e uruguaianit pas Botërorit, me të dyja palët që dëshirojnë një fillim të ri.
Ai ka marrë interesim nga Argjentina dhe Italia. Ndërkohë, Lenglet erdhi me një kontratë trevjeçare verën e kaluar si lojtar i lirë nga Barcelona, por francezi ka parë kohën e tij në fushë të ulet ndjeshëm me ardhjen e Hancko-s dhe shfaqjen e Pubill.
Molina, 27 vjeç, është në sezonin e tij të katërt te Atletico Madrid, por do të jetë në vitin e fundit të kontratës së tij sezonin tjetër. Nuk do të ishte befasi nëse “Los Rojiblancos” vendosin të përfitojnë ekonomikisht nga Molina para se ai të largohet falas.
Fituesi i Botërorit shpjegoi se i është dashur pak kohë për t’u përshtatur me jetën në Madrid për shkak të suksesit të tij ndërkombëtar.
“Ne kurrë nuk kthehemi pas, dhe kishte një vit kur fituam Copa America, pastaj Finalissima dhe ishim përsëri kampionë, pastaj fituam kualifikueset nga fillimi deri në fund dhe mundëm të gjithë. Pastaj Botërori dhe një tjetër Copa America. Kishte një kohë kur ndihesha pak poshtë, për të thënë kështu, sepse në fund nuk e shijoja aq sa duhet, duke përpunuar të gjitha ato informacione. Nuk e shijoja aq sa duhej në atë moment,” tha ai për “Agusneta y Leo Delia”, siç citohet nga “Marca”.
“Nuk ishte mungesë ambicie. Ishte një ndjesi e çorientuar. Rradhitja e suksesit, udhëtimet, ekspozimi, presioni i vazhdueshëm. Ndjenja që gjithçka po ndodhte shumë shpejt. Sot e shijoj shumë më tepër. Sot, kur mendoj për të, shoh video ose thjesht bisedoj me këdo, e shijoj shumë më tepër”./GazetaExpress/
