Drejtuesit e Barcelonës janë të vetëdijshëm se transferimi i sulmuesit të Atlético Madridit, Julián Álvarez, gjatë merkatos së verës do të jetë shumë i vështirë.

Álvarez vlerësohet për shpejtësinë, lëvizjen e pandalshme dhe aftësinë për të shënuar gola, duke u konsideruar si një profil ideal për sistemin e trajnerit Hansi Flick.

Sipas “Sport”, Barcelona po shqyrton mundësinë e një marrëveshjeje shkëmbimi për ta siguruar argjentinasin.

Katalanasit synojnë të bindin Atlético Madridin që të pranojë një shumë parash së bashku me një nga lojtarët si Marc Casadó ose Ferran Torres.

Megjithatë, qëndrimi i klubit madrilen është i prerë.

Sipas raportimeve, Atlético i ka bërë të qartë rrethit të lojtarit se nuk do të pranojë ulje çmimi, edhe nëse përfshihen lojtarë në marrëveshje, dhe se transferimi duhet të jetë vetëm me para, me vlerë që arrin deri në 100 milionë euro.

Në këto kushte, Barcelona nuk e konsideron këtë transferim si të realizueshëm apo të favorshëm, duke marrë parasysh rrezikun e madh financiar që do të sillte një investim i tillë./GazetaExpress/