Eliminimi i fundit i Atlético de Madrid nga Kupa e Botës për Klube ka shkaktuar një tërmet të vërtetë në zyrat e “Metropolitanos”.

Pakënaqësia e Diego Pablo Simeone-s, i cili nuk mori asnjë përforcim para turneut, ka qenë vendimtare që klubi të ndryshojë rrënjësisht strategjinë e tij në merkato. Pas javësh pasiviteti, drejtuesit e klubit janë të gatshëm të "thyejnë arkën" dhe të bëjnë një investim historik: 160 milionë euro të dedikuara për përforcimin e skuadrës me katër afrime kyçe.

Sipas asaj që raporton FutbolFantasy, Álex Baena, Rodrigo Ruggeri dhe Johnny Cardoso janë thuajse të sigurt si afrime të reja. I pari do të vijë nga Villarreal për rreth 50 milionë euro, ndërsa mbrojtësi i ri argjentinas do të kushtojë rreth 20 milionë. Nga ana tjetër, mesfushori amerikan vlerësohet në rreth 30 milionë euro dhe do të ishte një investim për të tashmen dhe të ardhmen e skuadrës bardhekuqe. Këtyre tre emrave u shtohet edhe një përforcim i nivelit të lartë: qendërmbrojtësi argjentinas Cristian “Cuti” Romero. Atlético është në negociata të avancuara me Tottenham, dhe marrëveshja mund të mbyllet për një shifër pranë 60 milionë eurove.

Ideja është e qartë: t’i ofrohet Simeone-s një skuadër më e thelluar, të zëvendësohen largimet e fundit si Ëitsel, Azpilicueta apo Reinildo, dhe të ringjallet një projekt që po përballet me kritika për ngecje në aspektin konkurrues. Megjithatë, kjo ofensivë në merkato nuk është pa rreziqe. Brenda ambientit të klubit tashmë përflitet për një shitje të madhe të mundshme për të balancuar bilancet financiare dhe për të shmangur problemet me “fair play-in” financiar.

Ajo që duket e sigurt është se Atlético ka vendosur të veprojë. Dhe po e bën në mënyrë madhore, i vendosur të tregojë se mbetet një nga aktorët kryesorë të futbollit europian.