Atletico Madrid po afron drejt arritjes së një marrëveshjeje për të mbajtur në ekip Clement Lenglet, i huazuar nga Barcelona, para FIFA Club Ëorld Cup.

Futbollisti francez luajti në 34 ndeshje në të gjitha kompeticionet gjatë sezonit 2024/25, pasi u bashkua me Atletico për një huazim sezonor nga Barcelona. Meqenëse Hansi Flick është i kënaqur me opsionet e tij në mbrojtje, Lenglet nuk ka vend në Barcelonë dhe dëshiron të qëndrojë në Madrid.

Të dy klubet kanë qenë në bisedime për të gjetur një zgjidhje, me presidentin e Atletico Madrid, Enrique Cerezo, që ka lënë të kuptohet se një marrëveshje është afër. Ai tha: “Lenglet është lojtar i Barcelonës. Do të flasim. Mendoj se do të ketë një marrëveshje që ai të qëndrojë me ne,” siç raportoi Sport.

Atletico dëshiron të mbyllë marrëveshjen para fillimit të FIFA Club Ëorld Cup. Sipas Marca, klubet kanë arritur një pikë të përbashkët që lejon Lenglet të largohet nga Barcelona pa pagesë.

Kontrata aktuale e Lenglet me Barcelonën skadon në qershor 2026 dhe ai përfiton një pagë bruto vjetore prej 16 milionë eurosh, që ka penguar shitjet e mëparshme. Barcelona dëshiron të heqë pagën e tij nga shpenzimet për të pasur mundësi të bëjë rinovime të tjera dhe për t’u përmbajtur rregullave financiare të La Ligës.

Atletico do të presë sa më afër afatit të 10 qershorit për ta përfshirë Lenglet në planet e tyre për Club Ëorld Cup.

Skuadra e Diego Simeones nis garën në Grupin B kundër finalistëve të UEFA Champions League, Paris Saint-Germain, më 15 qershor. Pas tyre vijnë ndeshjet ndaj skuadrës MLS Seattle Sounders më 19 qershor dhe klubit brazilian Botafogo më 23 qershor.

Nëse Atletico përfundon e dyta në Grupin B, do të ndeshet me fituesit e Grupit A, ku bën pjesë skuadra e Lionel Messit, Inter Miami. Pozicioni i parë në Grupin B do t’i vendosë kundër ekipit që mbyll në vend të dytë në të njëjtin grup në fazën e 16 më të mirëve.