Ish-ylli i Tottenhamit dhe Real Madridit, Gareth Bale, ka pranuar se është shqetësuar nga mundësia e falimentimit financiar pas përfundimit të karrierës së tij si futbollist.
36-vjeçari u tërhoq nga futbolli profesionist pas Kupës së Botës 2022 dhe që atëherë i është përkushtuar golfit, ka hapur Elevens Bar dhe Par 59 në qendër të Cardiffit, si dhe ka investuar në një distileri uiski në Uells dhe në ligën e golfit TGL të themeluar nga Tiger Woods.
Megjithëse dikur ishte lojtari më i paguar në botë, pasi në vitin 2016 nënshkroi një kontratë me vlerë 150 milionë funte me Real Madridin, Bale ka zbuluar se gjithmonë e ka pasur frikën e falimentimit, ndaj edhe është treguar shumë i kujdesshëm me financat e tij.
“Gjithmonë më ka frikësuar diçka nga brenda. Lexon artikuj për ish-sportistë që, pasi mbarojnë karrierën, falimentojnë. Nuk dinë si t’i menaxhojnë paratë, nuk dinë si të veprojnë më tej,” – tha Bale për Front Office Sports.
“Shumë sportistë, imagjinoj, jetojnë një jetë të shfrenuar e luksoze. Unë jam përpjekur të mos e bëj këtë. Gjithmonë kam menduar se si do të ishte jeta pas futbollit. Kur përfundon, nuk merr më pagë. Si i rindërtojnë njerëzit jetët e tyre pastaj?
Kështu që kam filluar herët të diversifikoj. Kam pasur gjithmonë këtë ide të ‘shtyllave’ — të investoja në gjëra të ndryshme. Nëse njëra shtyllë rrëzohet dhe nuk funksionon, e gjithë ndërtesa nuk bie.”
Bale ka nisur të shfaqet herë pas here si analist sportiv për TNT Sports, duke komentuar ndeshje të rëndësishme, përfshirë finalen e Europa League, ku Tottenham fitoi ndaj Manchester United.
Ai gjithashtu ka qenë pjesë e një konsorciumi që kishte shprehur interes për blerjen e klubit Cardiff City, duke qëndruar kështu pranë futbollit edhe pas pensionimit.
