Barcelona është lidhur me një transferim të mundshëm të Marcus Rashford këtë verë, ndërsa Manchester United po përgatitet për largimin e tij të radhës, pas huazimit të sulmuesit te Aston Villa gjatë pjesës së dytë të sezonit të kaluar.

Në atë kohë, Barcelona kishte tentuar ta nënshkruante Rashfordin, por marrëveshja nuk u realizua për shkak të problemeve të mirënjohura financiare. Megjithatë, katalanasit janë të gatshëm të rinisin bisedimet me Manchester United gjatë kësaj vere.

Sipas “Sport”, Barcelona është e interesuar ta afrojë Rashfordin, por vetëm në rast se Pau Víctor largohet – gjë që pritet të ndodhë. Për më tepër, do të jetë e nevojshme të lirohet ndjeshëm hapësira në buxhetin e pagave që kampionët e La Ligës të mund të përballojnë rrogën e tij.

Barcelona e ka si prioritet Nico Ëilliams për krahun e majtë të sulmit, dhe marrëveshja me Athletic Club pritet të finalizohet javën e ardhshme. Nëse kjo ndodh, opsionet sulmuese për Hansi Flick do të plotësoheshin, por largimi i Víctor do të hapte derën për Rashfordin, i cili po konsiderohet vetëm për një transferim në formë huazimi.

Barcelona e ka komunikuar këtë situatë me përfaqësuesit e Rashfordit, të cilët janë informuar gjithashtu se një marrëveshje mund të mos kërkohet deri në ditët e fundit të merkatos së verës, që mbyllet në shtator. Kjo duket se është pranuar nga vetë lojtari, i cili ka vendosur të refuzojë të gjitha ofertat e tjera derisa mundësia për t’u transferuar në Katalonjë të mbetet e hapur.

Dëshira e Rashford për të kaluar te Barcelona është theksuar edhe më shumë nga gatishmëria e tij për të ulur pagën, në mënyrë që klubi katalanas të mund ta përfshijë atë brenda kufirit të vendosur nga La Liga. Por për momentin, ai do të duhet të presë për të zbuluar nëse ky transferim ëndrrash do të bëhet realitet.