Barcelona dhe Real Madrid në vitet e fundit e kanë kthyer në politikë vëzhgimin e tregut të lojtarëve të lirë, duke synuar përforcime me përvojë dhe vlerë. Real Madridi ka pasur ndikim të madh në planet e transferimeve të Liverpoolit me këtë strategji, dhe Barcelona shpreson të ndjekë të njëjtin shembull.
Los Blancos janë shumë të interesuar për mbrojtësin francez të Liverpoolit, Ibrahima Konaté, dhe refuzimi i tij për të rinovuar kontratën do të thotë se ata mund t’i afrohen për një transferim të lirë në janar – njësoj siç bënë me Trent Alexander-Arnold. Kjo ka detyruar Liverpoolin të lëvizë për një zëvendësues të mundshëm, anglezin Marc Guehi, por marrëveshja prej 35 milionë eurosh me Crystal Palace dështoi ditën e fundit të merkatos, gjë që sipas raporteve nuk i ka pëlqyer as vetë lojtarit.
Sipas Sport, Guehi është futur tashmë në radarin e drejtorit sportiv të Barcelonës, Deco. Blaugranët e shohin me interes situatën kontraktuale të 25-vjeçarit, i cili është një nga mbrojtësit më mbresëlënës në Premier League. Shumëkush mendon se Liverpooli do të rikthehet për ta nënshkruar, duke qenë se kishte arritur marrëveshje personale me të përpara se transferimi të dështonte, por raporti thekson gjithashtu se edhe Real Madridi po ndjek nga afër situatën e tij.
Pas largimit të Iñigo Martínez këtë verë, Barcelona aktualisht ka si opsione në qendër të mbrojtjes Eric Garcian, Jules Kounde, Andreas Christensen, Ronald Araujon dhe Pau Cubarsín. Me kontratën e Christensen që skadon verën e ardhshme dhe me Kounde që shpesh luan si mbrojtës i djathtë, ekziston hapësirë për një shtesë të re në prapavijë.
Në teori, Araujo shihet si partneri më i mundshëm afatgjatë për Cubarsín, por kanë kaluar rreth dy vite që uruguaiani nuk ka ofruar vazhdimësi të qëndrueshme, dhe nëse nuk arrin të tregojë veten këtë sezon, edhe e ardhmja e tij mund të vihet seriozisht në dyshim./GazetaExpress/
