E ardhmja e Marc-André ter Stegen te Barcelona është bërë gjithnjë e më e pasigurt, edhe pse tashmë duket se ai nuk do të largohet këtë verë, për shkak të një operacioni në shpinë që do ta mbajë jashtë fushave për disa muaj.

Vetë Ter Stegen konfirmoi se do t’i nënshtrohet ndërhyrjes kirurgjikale dhe deklaroi se do të mungojë për tre muaj. Kjo ka zemëruar drejtuesit e Barcelonës, të cilët shpresonin që portieri gjerman të qëndronte jashtë për të paktën katër muaj, pasi kjo do t’u lejonte atyre të përdorin 80% të pagës së tij për të regjistruar zëvendësuesin Joan Garcia në La Liga.

Drejtuesit katalanas dyshojnë se Ter Stegen ka vendosur qëllimisht afatin prej tre muajsh, në mënyrë që klubi të mos mund të përfitojë nga rregullorja e La Ligës për zëvendësimet e përkohshme. Kjo situatë ka dëmtuar më tej marrëdhëniet mes lojtarit dhe klubit, që tashmë ishin të tendosura.

Për pasojë, janë shtuar zërat brenda ambientit të Barcelonës që kërkojnë që Ter Stegen të hiqet nga pozita e kapitenit të skuadrës. Sipas Sport, vendimi për këtë do të merret pak para fillimit të sezonit 2025-26 në La Liga.

Tradicionalisht, grupi i kapitenëve për sezonin e ri vendoset përmes një votimi të skuadrës së parë, që zhvillohet pas Trofeut Joan Gamper. Kjo është edhe skema që planifikohet për sezonin e ardhshëm. Megjithatë, disa zyrtarë të klubit po i bëjnë presion trajnerit Hansi Flick që të ndërhyjë dhe të marrë vendimin para këtij procesi.

Situata mes Barcelonës dhe Ter Stegen pritet të jetë një nga temat kryesore gjatë verës. Edhe pse largimi i tij nuk pritet, pasi 33-vjeçari ka shprehur dëshirën për të qëndruar, dhe për shkak të dëmtimit nuk ka klube që janë të gatshme të rrezikojnë me një transferim të tij në këtë moment./GazetaExpress/