Marcus Rashford ka nisur me ritëm të lartë aventurën e tij te Barcelona, duke lënë menjëherë shenjë në Champions League me dy gola ndaj Newcastle United, dhe raportet nga Spanja tregojnë se katalanasit janë shumë të kënaqur me progresin e tij.

Sulmuesi anglez, i cili u largua nga Manchester United pas një periudhe të vështirë nën drejtimin e Ruben Amorim, kaloi verën e kaluar në huazim te Barça, pas një gjysmë-sezoni pozitiv me Aston Villan.

Me ardhjen në “Camp Nou”, Rashford gjeti hapësirën që i mungonte në Old Trafford dhe deri më tani është aktivizuar nga trajneri Hansi Flick në ndeshjet kyçe si në La Liga ashtu edhe në Champions.

Performanca e tij më e bujshme ishte në St James’ Park, ku me dy gola të shënuar i dha Barcelonës një fitore të madhe në debutimin e fazës së ligës së Champions League. Kjo paraqitje ka bërë që drejtuesit e klubit të shprehen entuziastë për përshtatjen dhe përkushtimin e lojtarit 27-vjeçar.

Sipas Sky Sports, Rashford ndihet i integruar në qytet dhe në skuadër, ndërsa Barcelona e sheh si një element që mund të ketë peshë afatgjatë. Megjithatë, pavarësisht opsionit për blerje përfundimtare prej 30 milionë eurosh të përfshirë në marrëveshjen e huazimit, klubi katalanas nuk ka ndërmend ta diskutojë këtë çështje para fundit të sezonit. Arsyeja lidhet me parametrat financiarë dhe me dëshirën për të parë vazhdimësinë e formës së lojtarit gjatë gjithë fushatës.

Rashford, i cili ka edhe tre vite kontratë me Manchester United, duket larg rikthimit në “Old Trafford”, pasi nuk është më pjesë e planeve të Ruben Amorim. Pas një periudhe të vështirë ku u vu në pikëpyetje angazhimi i tij, huazimi te Aston Villa sezonin e kaluar i riktheu vetëbesimin, ndërsa tashmë në La Liga duket i gatshëm për një “rinisje” të plotë të karrierës së tij.

Nëse vazhdon me këtë ritëm, Barcelona mund ta shohë Rashfordin si një investim të vlefshëm afatgjatë, por vendimi përfundimtar do të merret vetëm në fund të sezonit. /GazetaExpress/