Barcelona po kërkon mundësi të favorshme në afatin kalimtar të janarit, me synimin për të afruar një mbrojtës funksional, të paktën deri në fund të sezonit.

Humbja e Andreas Christensen e ka lënë repartin mbrojtës të Barcelonës, tashmë të cunguar, edhe më të dobët. Megjithatë, sipas raportimeve që vijnë nga kryeqyteti portugez, zgjidhja e problemeve të katalanasve nuk gjendet te Nicolas Otamendi.

Mbrojtësi veteran ishte përmendur si një opsion surprizë për gjigantët katalanas, si një nga disa lojtarë që mund të ishin të disponueshëm me një kosto të ulët. Në moshën 37-vjeçare, Otamendi është me përvojë, i aftë të luajë në anën e majtë të mbrojtjes dhe ka eksperiencë edhe në La Liga. Largimi i një figure udhëheqëse si Inigo Martinez ka krijuar gjithashtu një boshllëk këtë sezon në vijën mbrojtëse të Barcelonës, boshllëk që ndoshta Otamendi mund ta kishte mbuluar.

Megjithatë, CNN Portugal, përmes Diario AS, ka hedhur poshtë pretendimet se Blaugranat janë të interesuar për mbrojtësin veteran argjentinas. Sipas tyre, Barcelona nuk ka interes për Otamendin dhe nuk ka pasur asnjë kontakt mes dy klubeve. Otamendi është i kënaqur për momentin në Lisbonë dhe, pavarësisht se kontrata e tij skadon në verë, pritet të qëndrojë aty. I pyetur për këtë çështje, trajneri i Benficës, Jose Mourinho, deklaroi: “Askush nuk më ka thënë asgjë për largimin e Otamendit. Nuk kam arsye të shqetësohem për këtë.”

Që nga dëmtimi i Christensen, disa mbrojtës janë lidhur me Barcelonën dhe nuk do të ishte çudi që agjentët të shfrytëzojnë këtë situatë për të nxjerrë emrat e klientëve të tyre në qendër të vëmendjes.

Dy mbrojtësit më të përfolur me Barcelonën gjatë javës së fundit kanë qenë Marcos Senesi i Bournemouth dhe Nathan Aké i Manchester City. Megjithatë, të dyja këto marrëveshje paraqesin vështirësi për katalanasit.

Presidenti Joan Laporta ka vendosur një moratorium për pagesat e lojtarëve që janë në gjashtë muajt e fundit të kontratës së tyre, siç është rasti i Senesit, gjë që ka gjasa t’i heqë Bournemouth-it çdo motiv për ta shitur. Nga ana tjetër, Manchester City po kërkon një largim të përhershëm për Aké dhe ka vendosur një çmim prej 25 milionë eurosh, shifër që me shumë gjasë tejkalon mundësitë e Barcelonës në janar.