Robert Lewandowski shënoi golin e fitores në minutën e 87-të, teksa Barcelona mposhti 2-1 Atlético Madridin në kryeqytetin spanjoll, duke krijuar një diferencë prej shtatë pikësh në krye të La Ligas.
Pas humbjes surprizë të Real Madrid ndaj Mallorcas, Barça e dinte se një rezultat pozitiv do ta forconte pozicionin në krye.
Ndeshja në “Metropolitano” nisi me ritëm të lartë, me Antoine Griezmannin që rrezikoi portën e Joan Garcías, ndërsa në anën tjetër Fermín López nuk arriti të shfrytëzojë pasimin perfekt të Lamine Yamalit.
Barça iu afrua golit me një tentativë të Yamal që preku shtyllën, por vendasit kaluan në avantazh me Giuliano Simeonen, i cili realizoi pas një topi të gjatë nga Clément Lengleti.
Megjithatë, epërsia zgjati pak, pasi skuadra e Hansi Flick barazoi vetëm tre minuta më vonë me Marcus Rashfordin, pas një kombinimi të bukur me Dani Olmon.
Para pushimit, Nicolás González u përjashtua me karton të kuq për Atléticon pas një ndërhyrjeje si lojtari i fundit ndaj Yamalit, duke i lënë vendasit me 10 lojtarë.
Në pjesën e dytë, Barcelona rriti presionin, me raste nga Yamal dhe Ferran Torres, por Juan Musso bëri pritje vendimtare.
Në fund, vendimtare ishte hyrja nga stoli e Lewandowskit.
Polaku shfrytëzoi një top të kthyer pas tentativës së João Cancelo dhe shënoi golin e fitores.
Barcelona kështu vazhdon serinë pozitive në të gjitha garat (9 ndeshje pa humbje) dhe shkon me moral të lartë drejt përballjes në çerekfinale të Ligës së Kampionëve kundër skuadrës së Diego Simeone./GazetaExpress/
