Planet e Barcelonës për afatin kalimtar të janarit janë vënë në dyshim gjatë fundjavës, pas dëmtimit të Andreas Christensen.

Mbrojtësi danez mund të mungojë për pjesën e mbetur të sezonit, pasi ka pësuar një dëmtim të pjesshëm të ligamentit të kryqëzuar anterior.

Christensen, i cili ka pasur probleme të vazhdueshme fizike që nga sezoni i tij i dytë në Katalonjë, pritet të jetë jashtë fushave për tre deri në katër muaj gjatë rikuperimit. Kjo e lë Barcelonën me Pau Cubarsí, Eric García, Gerard Martin dhe Ronald Araújo si opsionet kryesore në qendër të mbrojtjes. Martin ende po mëson këtë pozicion, Araújo ishte jashtë forme para pushimit të tij, ndërsa García është përdorur kryesisht në mesfushë.

Pas dëmtimit të Christensen, trajneri Hansi Flick deklaroi se do ta diskutonte situatën me drejtorin sportiv Deco. Kohëzgjatja e dëmtimit do t’i lejonte Barcelonës teorikisht të përdorte 80% të hapësirës së pagës së Christensen për të regjistruar një lojtar tjetër, në bazë të rregullit të dëmtimeve emergjente.

Megjithatë, duket se biseda ka qenë e shkurtër. Sipas Marca, Barcelona ka vendosur të mos bëjë asnjë përforcim gjatë afatit të janarit. Pavarësisht situatës në mbrojtje, klubi nuk është i bindur nga opsionet e disponueshme në treg dhe ka vendosur të mos ndërmarrë asnjë lëvizje për momentin.

Disa javë më parë, Deco kishte theksuar se ishte “shumë e vështirë” të operoje me sukses në tregun e dimrit.

Në përputhje me këtë strategji, klubi ka përjashtuar edhe largime. Marc Bernal dhe Marc Casadó kanë pasur pak minuta së fundmi, por pas këtij dëmtimi të fundit, asnjëri nuk do të lejohet të largohet në janar. Robert Lewandowski dhe Ronald Araújo pritet të qëndrojnë, ndërsa aktualisht edhe Marc-André ter Stegen nuk po konsideron një largim nga klubi.

Për herë të parë javën e kaluar, Flick përdori Casadó si alternativë të Jules Koundé në krahun e djathtë të mbrojtjes, ndërsa rikthimi i plotë në formë i Bernal mund të bëjë që Eric García të rikthehet sërish në qendër të mbrojtjes./GazetaExpress/