Barcelona do të luajë ndaj Atletico Madrid të martën pa kapitenin e tyre Ronald Araujo, i cili mungoi edhe në fitoren kundër Deportivo Alaves për shkak të një virusi të stomakut.

Megjithatë, sipas raportimeve të mediave spanjolle, arsyeja reale është më e thellë se çfarë është deklaruar zyrtarisht.

Araujo është prekur rëndë emocionalisht nga kartoni i kuq në ndeshjen kundër Chelsea në Stamford Bridge, që dëmtoi Barcelonën. Ky ndikim psikologjik, i kombinuar me problemet fizike, e ka bërë të pamundur pjesëmarrjen e tij ndaj Atletico Madrid.

Trajneri Hansi Flick ka vendosur t’i japë mbrojtësit uruguajan pushim për t’u rikuperuar fizikisht dhe mentalisht, duke e parashikuar rikthimin për ndeshjen kundër Real Betis fundjavën e ardhshme, shkruan Gazeta Express.

Në mungesë të Araujo, Gerard Martin mbuloi qendrën e mbrojtjes ndaj Alaves, ndërsa kundër Atletico pritet që Eric Garcia të rikthehet në qendër dhe Jules Kounde të nisë në pozicionin e mbrojtësit të djathtë.

Barcelona synon të marrë tre pikët dhe të konfirmojë rikthimin e formës më të mirë ndaj një rivali të fortë si Atletico Madrid. /GazetaExpress/