FC Barcelona do të përballet me Slavia Prague në një ndeshje vendimtare të UEFA Champions League, ku skuadra e drejtuar nga Hansi Flick është e detyruar të fitojë për të mbajtur gjallë shpresat për një vend në tetëshen më të mirë të fazës së ligës.

Katalanasit do të udhëtojnë pa dy emra të rëndësishëm në repartin ofensiv. Lamine Yamal do të mungojë për shkak të pezullimit prej një ndeshjeje, pas akumulimit të kartonëve të verdhë. Ndërkohë, Ferran Torres është zyrtarisht i dëmtuar, sipas raportit mjekësor të publikuar nga klubi.

Sulmuesi spanjoll ka pësuar një dëmtim në muskulin e këmbës së djathtë dhe pritet të mungojë rreth dhjetë ditë. Si pasojë, Ferran do të humbasë përballjet e Champions League ndaj Slavia Prague dhe Copenhagen, si dhe ndeshjen e La Ligës kundër Real Oviedo në “Spotify Camp Nou”.

Nëse rikuperimi shkon sipas planit, ai mund të rikthehet për sfidën në transfertë ndaj Elche më 31 janar dhe të jetë gati për çerekfinalen e Kupës së Mbretit ndaj Albacete.

Mungesa e Ferran Torres pritet të ketë ndikim të madh në zgjedhjet taktike të Flick. Ai është golashënuesi më i mirë i Barcelonës këtë sezon në të gjitha kompeticionet dhe ka qenë zgjedhja kryesore e trajnerit gjerman në majë të sulmit, përpara Robert Lewandowskit. Ferran raportohet se e ka pësuar dëmtimin gjatë ndeshjes ndaj Real Sociedad, para se të zëvendësohej.

Në mungesë të tij, alternativa më logjike është aktivizimi i Lewandowskit si sulmues qendror. Një tjetër opsion për Flick është përdorimi i Marcus Rashford në këtë rol, duke marrë parasysh përvojën e tij te Manchester United. Gjithashtu, nuk përjashtohet mundësia e aktivizimit të Olmo si “false 9”, me Fermin që mund të veprojë pas tij.

Lajmi pozitiv për Barcelonën para kësaj sfide të rëndësishme është rikthimi i Raphinha. Braziliani mungoi ndaj Real Sociedad pas një goditjeje të pësuar në ndeshjen kundër Racing Santander, por tani është gati të rikthehet. Prania e tij i jep skuadrës më shumë besim, pasi nuk është rastësi që seria e fitoreve të Barcelonës u ndërpre pikërisht në mungesë të tij.

Raphinha konsiderohet një element kyç në sistemin e Flick dhe pritet të startojë në krahun e majtë ndaj Slavia Prague, në një ndeshje ku Barcelona synon vetëm fitoren. /GazetaExpress