FC Barcelona synon një lëvizje të madhe në merkaton e ardhshme dhe në listën e dëshirave të saj ndodhet sulmuesi i Manchester City, Erling Haaland.

Megjithëse norvegjezi ka një kontratë afatgjatë dhe vlerë të lartë në treg, klubi katalanas po përgatit një strategji që mund të përfshijë një shkëmbim lojtarësh – me Dani Olmon si pjesë të operacionit – për të ulur koston e transferimit, sipas “El Nacional”.

Situata është e ndërlikuar, por dëshira e Barcelonës për të firmosur me Haaland nuk është shuar. Presidenti Joan Laporta e mban sulmuesin norvegjez në radar si pasuesin ideal të Robert Lewandowskit, kur kontrata e këtij të fundit të përfundojë në verën e vitit 2026.

Transferimi i Haaland do të ishte një bast i madh sportiv dhe financiar për klubin katalanas. Sulmuesi i City-t numëron statistika mbresëlënëse dhe prania e tij do t’i sillte Barcelonës jo vetëm gola, por edhe ndikim global dhe potencial për trofe të mëdhenj.

Megjithatë, blerja e Haaland nuk është aspak e thjeshtë. Paga e tij e lartë, statusi i tij si yll i Manchester City-t dhe mungesa e një klauzole lirimi e bëjnë pothuajse të paarritshëm. Sipas mediave të specializuara, City mund të kërkojë rreth 175 milionë euro – një shumë që tejkalon aktualisht mundësitë e Barcelonës.

Për këtë arsye, drejtuesit blaugrana kanë hartuar një plan alternativ: përfshirjen e Dani Olmos në marrëveshje për të ulur shpenzimet direkte. Klubi beson se Olmo nuk po kalon momentin e tij më të mirë dhe largimi i tij do të hapte hapësirë financiare. Kështu, Barça synon të paraqesë një ofertë të kombinuar – para plus lojtar – për të bindur Manchester City-n.

Interesi i Barcelonës për Haaland është i përqendruar në verën e vitit 2026, periudhë kur Lewandowski mund të tërhiqet ose të pranojë një rol të ri. Në këtë kontekst, nënshkrimi me norvegjezin do të shënonte fillimin e një epoke të re ofensive, me një sulmues modern, të fuqishëm dhe me potencial afatgjatë.

Nga ana tjetër, Manchester City nuk e ka mbyllur plotësisht derën. Pep Guardiola ka pranuar se “çdo klub do të donte ta kishte Haaland”, duke lënë hapur një mundësi, edhe pse të vështirë.

Burime pranë klubit anglez theksojnë se vullneti i vetë lojtarit do të jetë vendimtar. Nëse Haaland vendos se cikli i tij në Angli ka përfunduar, Barcelona mund të ketë një avantazh të rëndësishëm.

Për të realizuar këtë operacion gjigant pa rrezikuar stabilitetin financiar, Barça duhet të shesë disa lojtarë, të ulë masën e pagave dhe të sigurojë të ardhura shtesë.

Shkëmbimi me Dani Olmon shihet si element kyç në këtë strategji për të ulur koston dhe për të bindur Manchester City-n. Gjithçka do të varet nga momenti i duhur dhe nga aftësia për ta bërë Haaland të shohë Barcelonën si destinacionin ideal./GazetaExpress/