Barcelona ka përgatitur plane për të bërë të paktën dy ose tre transferime të mëdha në verën e vitit 2026.

Një sulmues qendror kërkohet për të zëvendësuar Robert Lewandowski, ndërsa klubi dëshiron edhe një mbrojtës të ri qendror, një repart ku katalanasit kanë pasur probleme këtë sezon.

Barcelona ka pasur vështirësi të mbulojë boshllëkun e lënë nga Inigo Martinez, i cili iu bashkua Al-Nassr verën e kaluar.

Pau Cubarsi dhe Eric Garcia kanë qenë dyshja e qendrës së mbrojtjes nën drejtimin e Hansi Flick muajt e fundit, por ekziston dëshira për të sjellë një mbrojtës natyral të majtë, pasi Gerard Martin është opsioni i vetëm aktual.

Nico Schlotterbeck dhe Goncalo Inacio janë lidhur me klubin muajt e fundit, por objektivi i madh është Alessandro Bastoni.

Sipas raportimeve, ylli i Inter Milan dhe i Italisë shihet si objektivi i ëndrrave për kampionët në fuqi të La Liga, ndërsa interesim për të ka edhe Arsenal.

Bastoni është në radarët e Barcelonës prej disa muajsh dhe në dhjetor janë zhvilluar bisedime me përfaqësuesit e tij.

Një rikthim në rregullin financiar 1:1 të La Ligës do t’i jepte Barcelonës më shumë shanse për ta transferuar, megjithatë qëndrimi i Interit është i qartë: ai nuk është në shitje.

Nuk ka dyshim se Bastoni do të ishte një përforcim ideal për Barcelonën, falë cilësive të tij mbrojtëse dhe aftësisë së shkëlqyer në pasim që përshtatet me stilin e Flick.

Megjithatë, një marrëveshje duket shumë e vështirë, pasi Inter nuk ka asnjë dëshirë të shesë një nga lojtarët e tij më të mirë. Katalanasit mund të tentojnë në verë, por gjasat për sukses nuk duken të mëdha./GazetaExpress/