Barcelona nuk do t’ia plotësojë kërkesën Hansi Flickut për të afruar një mbrojtës qendror gjatë afatit kalimtar të janarit.

Dëmtimi i Andreas Christensen e ka lënë ekipin katalanas me mungesa në mbrojtje, dhe duket se João Cancelo do të jetë përforcimi i vetëm këtë dimër.

Sipas raportimeve, Al-Hilal dhe Barcelona kanë arritur një marrëveshje që Cancelo të rikthehet në “Camp Nou” në formë huazimi për gjysmën e dytë të sezonit.

“Sport” shkruan se ky do të jetë afrimi i vetëm në janar dhe, nëse nuk ndodh ndonjë dëmtim tjetër i rëndësishëm, nuk ka plane për lëvizje të tjera në merkato.

E vetmja pikë pasigurie është Marc-André ter Stegen, i cili do të lejohet të largohet nëse arrihet një marrëveshje – Girona është aktualisht klubi më i interesuar për veteranin gjerman.

Edhe nëse ai largohet, nuk parashikohen afrime të tjera. Emra si Marc Casadó dhe Marc Bernal janë përmendur gjithashtu për largime, por pritet të qëndrojnë te Barcelona të paktën deri në fund të sezonit, pavarësisht minutazhit të kufizuar.

Edhe pse nuk ishte ajo që dëshironte, Flick i ka dhënë dritën jeshile ardhjes së Cancelos.

Me sa duket, atij i është bërë e qartë se Barcelona vështirë se mund të gjente një mbrojtës qendror të cilësisë së kërkuar dhe se Cancelo, të paktën, ka aftësinë të shtojë thellësi në të dy krahët.

Barcelona ka shumë pak hapësirë për manovrim financiar, pasi marrëveshja për Cancelon do të konsumojë të gjithë limitin prej 5 milionë eurosh të liruar nga dëmtimi i Christensenit.

Kjo e lë Flickun pa një zgjidhje shtesë në qendër të mbrojtjes. Gerard Martín ka qenë i qëndrueshëm si një zgjidhje e improvizuar, por Ronald Araújo dhe Eric Garcia ende nuk e kanë fituar plotësisht besimin e Flickut përkrah Cubarsít, ndërsa Jules Koundé ka vazhduar të luajë si mbrojtës i djathtë./GazetaExpress/