FC Barcelona ka përmbyllur një nga kapitujt më të vështirë financiarë në historinë e saj, duke bërë pagesën e fundit të pagave të shtyra që datojnë nga kriza e vitit 2020.

Situata e rënduar ekonomike nën drejtimin e ish-presidentit Josep Maria Bartomeu dhe pasojat e pandemisë e detyruan klubin të arrinte marrëveshje për të vonuar pagesat ndaj shumicës së lojtarëve dhe stafit.

Në total, u shtynë rreth 121.7 milionë euro paga, të cilat u ndanë në tetë këste deri në qershor të vitit 2025. Pagesa e fundit, në vlerë prej 16 milionë eurosh, është bërë për 20 lojtarë të ekipit të parë, disa të Barça Atlètic dhe katër anëtarë të stafit teknik, përfshirë Ronald Koeman.

Lojtari që kishte shumën më të madhe të shtyrë ishte Leo Messi, me 47.6 milionë euro, prej të cilave i janë paguar së fundmi 5.96 milionët e fundit. Pas tij, renditet Samuel Umtiti me 9.9 milionë euro, ndërsa edhe emra si Busquets, Griezmann, Jordi Alba e Coutinho kishin shuma të konsiderueshme të papaguara.

Kjo pagesë shënon fundin e një periudhe të vështirë për Barcelonën, duke i dhënë fund borxheve të trashëguara nga e kaluara dhe duke konfirmuar angazhimin e klubit për stabilitet financiar.