Në prag të verës së ardhshme, një nga vendimet më të rëndësishme që Barcelona duhet të marrë lidhet me Robert Lewandowskin dhe të ardhmen e tij në klub. Sulmuesit polak i skadon kontrata aktuale në qershorin e ardhshëm, që do të thotë se ky sezon mund të jetë i fundit për të me ngjyrat “blaugrana”.

Pavarësisht se është 37 vjeç, Lewandowski vazhdon të tregojë një nivel të shkëlqyer shënimi. Ai ka realizuar katër gola në La Liga këtë sezon, megjithëse ka luajtur vetëm në shtatë ndeshje në total, por është e natyrshme që në klub të mendojnë për pasuesin e tij, duke pasur parasysh moshën.

Deklaratat e fundit nga drejtori sportiv Deco kishin lënë të kuptohej se Lewandowski mund të qëndronte në klub të paktën deri në vitin 2027, por sipas “Sport”, tashmë është vendosur që sulmuesit veteran nuk do t’i ofrohet një kontratë e re, që do të thotë se ai do të largohet sapo t’i përfundojë marrëveshja aktuale në qershorin e ardhshëm.

Arsyet që kanë çuar drejtuesit e Barcelonës në këtë vendim janë mosha e tij, rënia e lehtë në performancë dhe fakti që nuk është më në gjendje të ushtrojë presion ndaj kundërshtarëve me intensitetin e pjesës tjetër të skuadrës. Për këtë arsye, klubi nuk pritet t’i ofrojë rinovim para përfundimit të kontratës.

Nëse Lewandowski largohet, Ferran Torres do të mbetet i vetmi opsion i natyrshëm si qendërsulmues në dispozicion të Hansi Flick. Prandaj, Barcelona do të duhet të sigurojë një zëvendësues. Klubi ka shprehur interes për Julian Alvarez të Atletico Madridit, por sipas raportit, është më e mundshme që të transferohet Karl Etta Eyong, pasi ideja është të sillet një profil më i ri që mund të ofrojë konkurrencë të menjëhershme.

Kjo zgjedhje ka logjikë për Barcelonën, duke pasur parasysh se klubi me shumë gjasë nuk do të ketë fondet e nevojshme për të blerë Alvarez, i cili do të kushtonte mbi 100 milionë euro./GazetaExpress/