Barcelona ka vendosur 15 mars 2026 si datën për zgjedhjet presidenciale, ku Joan Laporta do të kandidojë për të ruajtur postin e tij si president i klubit katalanas.

Laporta, i cili u shfaq para mediave pas fitores së Barça Femeni ndaj Real Madrid në Superkupën e Spanjës, u shpreh i bindur se arritjet e tij gjatë mandatit të tanishëm do t’i japin avantazh në zgjedhje.

“Me besim dhe dëshirë për të shpjeguar gjithçka që kemi bërë. Besoj se njerëzit e kuptojnë gjithë punën tonë,” tha ai, duke theksuar rëndësinë e një procesi demokratik dhe të drejtë dhe duke ftuar të gjithë anëtarët të votojnë për bordin e ardhshëm.

Laporta theksoi gjithashtu se zgjedhjet nuk duhet të ndikojnë te skuadrat sportive apo planifikimet e klubit. “Kjo duhet menaxhuar me normalitet të plotë për të mos shqetësuar ekipet tona sportive në të gjitha kategoritë. Në këtë kuptim, kjo datë është më e përshtatshmja,” shtoi ai.

Presidenti i Barcelonës gjithashtu foli për vizionin e tij afatgjatë, duke theksuar se plani i tij nuk ka të bëjë vetëm me ekipin e parë, por edhe me futbollin e femrave, basketbollin, hokejin, futsalin dhe hendbollin, për të siguruar një zhvillim të qëndrueshëm në të gjitha sportet e klubit.

Në zgjedhjet e ardhshme do të sfidojnë Laportan tre kandidatë të tjerë të spikatur, përfshirë edhe Victor Font, i cili kandidoi edhe në zgjedhjet e kaluara.

Barcelona synon që procesi të jetë një model demokratik dhe transparent, duke mbajtur fokusin te sporti dhe performancat e ekipeve gjatë gjithë kohës. /GazetaExpress