Barcelona ka bërë një tjetër hap drejt transferimit të mbrojtësit qendror Alessandro Bastoni, i cili është objektivi kryesor për të përforcuar repartin defensiv. Ylli italian është i interesuar për një transferim në Kataloni, pas një sezoni zhgënjyes në aspekt personal, si me klubin ashtu edhe me kombëtaren.

Bastoni, 26 vjeç, duket se është prioriteti kryesor i Barcelonës për qendrën e mbrojtjes, ndërkohë që katalanasit po synojnë gjithashtu edhe një sulmues gjatë kësaj vere. Më herët gjatë kësaj jave u raportua se Barcelona kishte nisur bisedimet me lojtarin për kushtet personale.

Sipas Matteo Moretto në TV3, Bastoni tashmë ka rënë dakord për një transferim te Barcelona në verë. Ai thekson se negociatat për kushtet personale vazhdojnë, por lojtari është shumë i hapur për t’iu bashkuar blaugranëve këtë verë, dhe gjithçka varet nga arritja e një marrëveshjeje mes Barcelonës dhe Inter Milan.

Moretto shton se Interi është i hapur për një marrëveshje, gjë që përputhet edhe me raportimet e tjera nga Italia. Sipas tij, nëse Bastoni kërkon largimin dhe Barcelona ofron rreth 60 milionë euro plus bonuse, marrëveshja do të ishte e mundshme.

Çmimi për Bastonin ka variuar ndjeshëm: burime pranë klubit thonë se Interi kërkon 70-80 milionë euro për reprezentuesin italian, ndërsa të tjera raportime sugjerojnë se edhe 40-50 milionë euro mund të mjaftojnë për të bindur zikaltërit. Bastoni aktualisht ka edhe dy vite kontratë, por nuk ka shenja për rinovim në këtë fazë.

Dyshimi më i madh mbetet nëse Barcelona do ta finalizojë këtë transferim para se të zgjidhë çështjen e sulmuesit, gjë që mund ta vonojë ndjeshëm marrëveshjen. Kjo gjithashtu ngre pikëpyetje për aftësinë financiare të klubit për ta përballuar këtë transferim. Është raportuar se në rast të ardhjes së Bastonit, drejtori sportiv Deco do të kërkonte largimin e Andreas Christensen dhe Alvaro Cortes.