Bayern Munich raportohet se po shqyrton mundësinë e një lëvizjeje të papritur për njërin prej lojtarëve më të rëndësishëm të Liverpoolit, pikërisht në kohën kur klubi festonte titullin e 20-të në Angli me një paradë madhështore në qytet.

Të hënën pasdite, tifozët e Liverpoolit patën më në fund mundësinë të festonin fitimin e titullit historik në Premier League, teksa lojtarët dhe stafi parakaluan me autobusin e hapur duke shfaqur trofeun para qindra mijëra tifozëve që mbushën rrugët e qytetit në atmosferë entuziazmi dhe gëzimi të jashtëzakonshëm.

Megjithatë, kjo festë mund të zbehet disi pas një raportimi që pretendon se gjigantët evropianë të Bayern Munich po planifikojnë një lëvizje spektakolare për një nga lojtarët kryesorë të Liverpoolit.

Sipas gazetarit të Sky Sports Germany, Florian Plettenberg, kampionët e Bundesligës e kanë përfshirë Cody Gakpo në listën e tyre të ngushtë për të përforcuar krahun e majtë të sulmit. Raporti thekson se drejtori sportiv i Bayern Munich, Max Eberl, është një admirues i madh i yllit të Liverpoolit dhe tashmë ka nisur diskutimet e para rreth një transferimi të mundshëm në Mynih.

Edhe pse ende nuk është e qartë nëse Liverpool do të ishte i gatshëm të lejonte largimin e Gakpos, thuhet se ai është një nga disa sulmues që mund të konsiderohen për shitje, në rast se vjen një ofertë e konsiderueshme gjatë verës. 26-vjeçari ka kontratë me Liverpoolin deri në vitin 2028, që do të thotë se çdo ofertë duhet të jetë e rëndësishme për të bindur klubin.

Lajm i mirë për tifozët e Liverpoolit është fakti se Gakpo është vetëm opsioni i tretë në listën e dëshirave të Bayern, pas Kaoru Mitoma të Brighton dhe Rafael Leao të Milanit.

Që nga transferimi i tij nga PSV Eindhoven në dhjetor të vitit 2022, Gakpo ka zhvilluar 128 ndeshje për Liverpoolin, duke shënuar 41 gola dhe asistuar 17 herë.

Përveç Gakpos, edhe emra të tjerë si Luis Diaz, Darëin Nunez, Diogo Jota dhe Harvey Elliott përfliten si lojtarë që mund të largohen këtë verë, në funksion të një riorganizimi të skuadrës.

Liverpooli pritet të ketë një merkato shumë aktive, ku ndër përforcimet e para të mundshme përmenden Jeremie Frimpong dhe Florian Ëirtz nga Bayer Leverkusen, si dhe një marrëveshje që është në fazat përfundimtare për mbrojtësin e majtë të Bournemouth, Milos Kerkez./GazetaExpress/