Vëmendja në shtëpinë e Bayern Munichut është e përqendruar te situata e portës në prag të sfidës kundër Atalantës, e vlefshme për të tetën e finales së Ligës së Kampionëve.

Lajmi i fundit lidhet me gjendjen e Jonas Urbig, i cili u rikthye në stërvitje pas goditjes në kokë të pësuar në ndeshjen e parë.

Portieri gjerman është stërvitur rregullisht me skuadrën dhe ka dhënë sinjale pozitive, por vendimi përfundimtar për aktivizimin e tij nuk do të jetë teknik, por mjekësor, shkruan “Gazeta Express”.

Trajneri Vincent Kompany ka qenë i qartë në konferencë për shtyp: nëse gjithçka do të shkojë sipas planit, Urbig do të jetë titullar në portë, por fjala e fundit i takon stafit mjekësor, që duhet ta japë “dritën jeshile” përfundimtare.

Situata mbetet delikate për shkak të protokolleve të rrepta për tronditjet cerebrale, që kërkojnë rikuperim të plotë dhe mungesë simptomash përpara se një lojtar të rikthehet në fushë. Edhe pse ka marrë pjesë në stërvitje, lojtari ende është nën vëzhgim dhe do të vlerësohet deri në momentet e fundit para ndeshjes.

Në rast se Jonas Urbig nuk do të jetë i gatshëm, alternativa mbetet shumë e pazakontë: në portë mund të aktivizohet 16-vjeçari Leonard Prescott, një talent i ekipit të të rinjve, që do të debutonte në një ndeshje të tillë të rëndësishme.

Emergjenca është totale për bavarezët në këtë repart, pasi mungojnë edhe portieri titullar Manuel Neuer dhe rezervat e tjera, çka e bën situatën edhe më të komplikuar për skuadrën gjermane.

Megjithatë, Bayern Munich e nis ndeshjen me një avantazh shumë të madh pas fitores 6-1 në takimin e parë, çka ia jep njëfarë qetësie stafit teknik në menaxhimin e kësaj situate të ndërlikuar.

Objektivi mbetet i qartë: të administrohet avantazhi dhe të sigurohet kalimi në çerekfinale të Championsit, pavarësisht problemeve të shumta në portë. /Gazeta Express