Bashkimi Evropian ka reaguar ashpër ndaj situatës së sigurisë së gazetarëve në Serbi, duke kërkuar nga autoritetet që të reagojnë menjëherë ndaj kërcënimeve dhe sulmeve verbale e fizike, si dhe t’i dënojnë publikisht ato.

Shefi i Delegacionit të Bashkimi Evropian në Beograd, Andreas von Beckerath, pas një takimi me ambasadorët e vendeve anëtare dhe përfaqësues të komunitetit mediatik, theksoi se mediat e pavarura janë roje të interesit publik dhe garantojnë llogaridhënie të pushtetit.

Ai deklaroi se BE pret që autoritetet serbe të reagojnë shpejt ndaj çdo kërcënimi apo sulmi ndaj gazetarëve dhe të dënojnë qartë raste të tilla.

Fushatë targetimi kundër Veran Matiqit

Reagimi i BE-së vjen pasi në televizione dhe portale proqeveritare në Serbi është transmetuar një film propagandistik kundër gazetarit Veran Matiq, anëtar i Grupit të Përhershëm të Punës për Sigurinë e Gazetarëve dhe kryetar i Komisionit për Hetimin e Vrasjeve të Gazetarëve.

Në këtë material, Matiq etiketohet si person që ushqen “urrejtje ndaj çdo gjëje serbe” dhe akuzohet pa prova për shpërdorim fondesh.

Pas këtij filmi qëndron organizata joqeveritare Centar za društvenu stabilnost, e njohur për mbështetje të hapur ndaj pushtetit. Kjo organizatë ka organizuar më herët protesta në mbështetje të qeverisë dhe ka publikuar materiale që mohojnë gjenocidin në Srebrenicë dhe krime të tjera lufte.

Së fundmi, ajo ka publikuar në rrjete sociale një listë me mbi 40 emra gazetarësh dhe redaktorësh, për të cilët paralajmëron “emisione” të reja. Shoqatat e gazetarëve e kanë cilësuar këtë si “listë për gjah” dhe rrezikim të drejtpërdrejtë të jetës së tyre.

Reagimi i ministrit dhe statistikat alarmante

Ministri serb i Informimit, Boris Bratina, deklaroi se “nuk sheh asgjë të frikshme” në publikimin e listës dhe se nuk mund të dënojë paraprakisht materiale që ende nuk janë transmetuar.

Ndërkohë, redaksia e së përjavshmes “Radar” në Beograd ka raportuar kërcënime të reja në seksionin e komenteve në portalin e saj.

Sipas të dhënave të Shoqatës së Pavarur të Gazetarëve të Serbisë, gjatë vitit 2025 janë regjistruar mbi 280 incidente kundër gazetarëve – përfshirë 90 sulme fizike dhe dhjetëra kërcënime me vdekje. Platforma e Këshillit të Evropës për mbrojtjen e gazetarisë ka konstatuar se Serbia mban numrin më të lartë të sulmeve ndaj gazetarëve në rajonin e Ballkanit Perëndimor.

Reagimi i fortë i Bashkimit Evropian vjen në një kohë kur organizatat ndërkombëtare nxorën raportre për përkeqësim të lirisë së medias në Serbi dhe për një klimë presioni, etiketimi dhe frikësimi ndaj zërave kritikë ndaj regjimit të presidentit Aleksandar Vuciq.