Komisioni Evropian ka njoftuar sot një paketë mbështetje financiare prej 171 milion eurosh për përmirësimin e infrastrukturës dhe zhvillimin e sektorit privat në Ballkanin Perëndimor, por Serbia nuk përfshihet në këtë fond.

Sipas Komisionit, fondet do të shkojnë për Bosnjë e Hercegovinën, Malin e Zi, Shqipërinë dhe Maqedoninë e Veriut, duke synuar rritjen e bashkëpunimit rajonal dhe përparimin drejt integrimit evropian.

“Investimi në partnerët tanë nga Ballkani Perëndimor është thelbësor për afrimin e tyre me BE-në,” tha Marta Kos, komesare evropiane për zgjerim. “Nga infrastruktura te zhvillimi i biznesit, këto investime krijojnë mundësi reale për qytetarët.”

Nga totali, 91,8 milion euro do të shkojnë për projekte infrastrukturore, duke përfshirë:

Implementimin e internetit me shpejtësi të lartë në Shqipëri

Përmirësimin e sistemit të transmetimit të energjisë në Maqedoninë e Veriut

Rindërtimin dhe modernizimin energjetik të shkollave në Maqedoni dhe Mal të Zi

Elektrifikimin e hekurudhës Durrës-Tiranë në Shqipëri

Projekte për përmirësimin e furnizimit me ujë dhe trajtimin e ujërave të zeza në Bosnjë e Hercegovinë

Pjesa tjetër e paketës, 76,3 milion euro, synon mbështetjen e sektorit privat përmes programeve për ndërmarrjet e vogla dhe të mesme, financim inovativ për investime jo-tradicionale dhe forcimin e partneriteteve publike-private në Ballkan.

Megjithatë, për Serbinë nuk është parashikuar asnjë fonde nga ky paketë, edhe pse vendi është pjesë e rajonit. Ky fakt ka ngjallur reagime dhe kritika nga disa qarqe politike në Beograd, që e konsiderojnë mungesën e mbështetjes një sinjal shqetësues për dialogun dhe bashkëpunimin me Bashkimin Evropian.

Komisioni ka bërë të ditur se projektet do të realizohen nga partnerët lokalë së bashku me institucionet ndërkombëtare financiare, ndërsa një pjesë e vogël, 2,9 milion euro, shkon për ndihmë teknike në Shqipëri dhe Bosnjë për nxitjen e investimeve në energji, ujë, inovacion dhe kërkime shkencore. /Nova