Kërcënimi i vërtetë me të cilin përballet Hungaria nuk është Rusia, por Bashkimi Europian, u tha Kryeministri Viktor Orban mbështetësve të shtunën, ndërsa partia e tij nacionaliste intensifikon fushatën e saj anti-europiane përpara zgjedhjeve kombëtare.

Me vetëm tetë javë të mbetura deri në votimin e 12 prillit, Orban dhe partia e tij Fidesz përballen me sfidën e tyre më serioze që kur udhëheqësi populist i krahut të djathtë u rikthye në pushtet në vitin 2010.

Shumica e sondazheve të pavarura tregojnë se Fidesz është pas partisë së qendrës së djathtë Tisza dhe udhëheqësit të saj, Peter Magyar. Në fjalimin e tij, Orban e krahasoi BE-në me regjimin shtypës sovjetik që sundoi Hungarinë për më shumë se 40 vjet në shekullin e kaluar dhe hodhi poshtë bindjen e shumë udhëheqësve evropianë se Vladimir Putin është një kërcënim për sigurinë e kontinentit.

“Duhet të mësohemi me idenë se ata që e duan lirinë nuk duhet të kenë frikë nga Lindja, por nga Brukseli”, tha ai, duke iu referuar kryeqytetit de facto të BE-së në Belgjikë.

“Ngritja e frikës për Putinin është primitive dhe e papërgjegjshme. Brukseli, megjithatë, është një realitet i prekshëm dhe një burim rreziku i menjëhershëm. Kjo është e vërteta e hidhur dhe ne nuk do ta tolerojmë atë”, tha Orban.

Orban ka qenë një kundërshtar i vendosur i ndihmës ushtarake dhe ekonomike për Kievin që kur Rusia nisi pushtimin e saj gati katër vjet më parë, dhe mban lidhje të ngushta me Moskën, ndërsa ka miratuar një qëndrim agresiv ndaj partnerëve të Hungarisë në BE dhe NATO, të cilët ai i përshkruan si luftënxitës.

“Bashkimi Evropian ka vendosur të shkojë në luftë deri në vitin 2030. Nuk është se donte, mundte ose planifikonte ta bënte këtë, e ka vendosur. Zgjedhjet e prillit do të jenë zgjedhjet e fundit hungareze para luftës. Qeveria e ardhshme do të duhet të vendosë për çështjen e luftës dhe paqes. Brukseli ka vendosur që forcat ruse do të mposhten në tokën ukrainase. Kudo, përveç në Hungari dhe Sllovaki, përgatitjet për një luftë të mundshme janë duke u zhvilluar në mënyrë aktive. Shërbimi i detyrueshëm ushtarak është futur tashmë në nëntë vende, dhe në disa vende është zgjeruar edhe për gratë. Popullsisë po i dërgohen udhëzime se çfarë të bëjë në rast lufte, shpenzimet ushtarake janë rritur ndjeshëm. Janë nënshkruar marrëveshje që njësitë ushtarake do të dërgohen më vonë në Ukrainë, ato do të dërgohen drejt vdekjes së tyre”, theksoi ai.

Në dhjetor, ai tha se “nuk është e qartë se kush sulmoi kë” kur dhjetëra mijëra forca ruse pushtuan kufirin ukrainas në shkurt të vitit 2022.

Qeveria e Hungarisë ka qenë prej kohësh në kundërshtim me BE-në, e cila ka “ngrirë” miliarda euro fonde për Budapestin për shkak të shqetësimeve se Orban ka çmontuar institucionet demokratike, ka minuar pavarësinë e gjyqësorit dhe ka lejuar përhapjen e korrupsionit.

Në këmbim, Orbán po vepron gjithnjë e më shumë si një element reaksionar në vendimet e BE-së, duke kërcënuar sistematikisht të vërë veton ndaj politikave kryesore, siç është ofrimi i mbështetjes ekonomike për Ukrainën.

Ndërsa zgjedhjet afrohen, ai e portretizon gjithnjë e më shumë partinë e Tiszës si një kukull të BE-së të krijuar për të rrëzuar qeverinë e tij dhe për t’i shërbyer interesave të huaja, akuza që Tisza i ka mohuar me forcë.

Magyar, kreu i partisë, është zotuar të përmirësojë marrëdhëniet e tensionuara të Hungarisë me aleatët e saj perëndimorë, të ringjallë ekonominë dhe ta kthejë vendin në një rrugë më demokratike.

Përveç kësaj, të shtunën, Orbani akuzoi shumëkombëshet, si bankat dhe kompanitë e energjisë, se kanë përfituar nga lufta në Ukrainë dhe se kanë komplotuar me opozitën e tij për ta mposhtur atë në zgjedhje.

“Është absolutisht e qartë se në Hungari industria e naftës, bota bankare dhe elita e Brukselit po përgatiten të formojnë një qeveri,” tha ai.

“Ata kanë nevojë për dikë në Hungari që nuk do t’u thotë kurrë jo kërkesave të Brukselit”, shtoi Orban.

Nëse partia e tij fiton shumicën e pestë radhazi në zgjedhje, Orbani është zotuar të vazhdojë qëllimin e tij për të çliruar Hungarinë nga entitetet që ai thotë se shkelin sovranitetin e vendit.

Ai ia atribuoi Presidentit të SHBA-së Donald Trump, i cili e mbështeti atë para zgjedhjeve, krijimin e një mjedisi ku “OJF-të e rreme dhe gazetarët, gjyqtarët dhe politikanët e blerë” mund të dëbohen.

“Presidenti i ri i Shteteve të Bashkuara është rebeluar kundër rrjetit global të biznesit, gazetarisë dhe politikës së liberalëve, duke përmirësuar kështu shanset tona”, tha ai.

“Ne gjithashtu mund të shkojmë shumë larg dhe të largojmë nga Hungaria ndikimet e huaja, së bashku me agjentët e tyre, që kufizojnë sovranitetin tonë”, u shpreh Orban.

“Makina represive e Brukselit është ende duke vepruar në Hungari. Do ta pastrojmë atë pas prillit”, përfundoi kryeministri hungarez.