Një grua ukrainase-gjermane është arrestuar në Berlin për spiunazh për Rusinë, sipas Zyrës së Prokurorit Federal, ndërsa dy persona të tjerë po kërkohen si bashkëpunëtorë të saj.

Sipas informacioneve të deritanishme, Ilona V. (siç emërtohet gruaja që u arrestua) besohet se ka kaluar informacione rreth luftës në Ukrainë përmes një punonjësi në ambasadën ruse, i cili besohet se është i lidhur me shërbimet sekrete të vendit të tij.

Komunikimi i gruas me zyrtarin rus është konfirmuar që të paktën që nga nëntori i vitit 2023 dhe kishte të bënte me informacione rreth pjesëmarrësve në ngjarje kulturore të profilit të lartë, vendndodhjet e objekteve të prodhimit të armëve, testimin e dronëve dhe dërgesat e tyre në Ukrainë.

Ilona V. komunikonte rregullisht me ish-punonjës të departamentit të operacioneve të Ministrisë Gjermane të Mbrojtjes, të cilët i njihte personalisht, ndërsa ndihmonte kontaktin e saj në ambasadën ruse të fitonte akses në ngjarje, duke përdorur një pseudonim.

Si pjesë e operacionit të prokurorit, u kontrollua shtëpia e gruas së arrestuar në Brandenburg, si dhe ajo e dy të dyshuarve të tjerë në Mynih dhe Rheinland-Pfalz.

Dy burrat, të cilët po i shmangen arrestimit, janë ish-anëtarë të Bundeswehrit, njëri ushtar dhe i dyti punonjës administrativ. /Panorama