Bernardo Silva është lidhur prej vitesh me një kalim te Barcelona, por këtë herë duket më i realizueshëm se kurrë.

Klubi katalanas thuhet se ka përmirësuar ndjeshëm gjendjen financiare këtë vit, ndërsa Silva pritet të jetë i lirë në treg.

Mesfushori veteran është në përfundim të kontratës këtë verë, dhe sipas “A Bola” (përmes “Sport”), ai tashmë i ka komunikuar Manchester Cityt se synon të largohet.

Pas nëntë vitesh në “Etihad”, duket se portugezi dëshiron një sfidë të re.

Media portugeze shton se prioriteti kryesor i Silvës është transferimi te Barcelona, një ëndërr e kahershme për të.

Nëse Barcelona bën një ofertë, ai do ta vendosë në plan të parë.

Agjenti i tij, Jorge Mendes, tashmë ka nisur bisedimet me klubin katalanas për një lëvizje të mundshme.

Megjithatë, sipas “Marca”, Barcelona aktualisht nuk ka ndërmend ta transferojë Silvën.

Blaugranasit janë të mbuluar mirë në mesfushë, dhe pozicioni që i përshtatet më shumë atij – roli i numrit 10 – është i zënë nga Fermín López dhe Dani Olmo.

Ndërkohë, Silva pritet të ketë shumë oferta këtë verë.

Juventusi thuhet se është i gatshëm t’i ofrojë një kontratë trevjeçare me pagë 7-8 milionë euro në vit.

32-vjeçari mund të zgjedhë gjithashtu një transferim në Arabinë Saudite ose në MLS, ku Inter Miami ka shfaqur interes.

Në Spanjë është përmendur shkurtimisht edhe Atletico Madrid si opsion, ndërsa në Turqi një tjetër destinacion i mundshëm është Galatasaray./GazetaExpress/