300 punonjës të organizatës së zhvillimit të Kombeve të Bashkuara zhvendosen nga Shtetet e Bashkuara në Gjermani. Kjo është gjithashtu një pasojë e politikës së Donald Trump-it.

Në vështrim të parë, ky është thjesht një vendim administrativ brenda rrjetit të ndërlikuar të organizatave të OKB-së . Por kur Programi i Kombeve të Bashkuara për Zhvillim (UNDP) tani njofton se rreth 300 vende pune do të zhvendosen nga Nju Jorku në Bon të Gjermanisë, kjo natyrisht ka edhe një dimension politik. Edhe 100 anëtarë të e ekipit të UNDP-së do të zhvendosen nga Nju Jorku në Madrid. SHBA e kanë shkurtuar në mënyrë drastike ndihmën për zhvillim.

"Sistemi i OKB-së dhe parimet shumëpalëshe janë nën presion"

Sido që të jetë është e pazakontë që dy ministra gjermanë, një kryeministër rajonal dhe një kryetar bashkie të bëjnë një deklaratë të përbashkët.

Në letrën e shkurtër nga Ministri i Jashtëm Johann Wadephul (CDU), Ministrja e Zhvillimit Reem Alabali Radovan (SPD), kreu i qeverisë së landit të Rinit Verior-Vestfalisë Hendrik Wüst (CDU) dhe kryebashkiaku i Bonit Guido Déus (CDU), thuhet që në fillim: "Ky është një sinjal i rëndësishëm politik besimi për politikën e jashtme gjermane, veçanërisht në kohën kur sistemi i OKB-së dhe parimet shumëpalëshe janë nën presion. Megjithatë, sfidat globale si luftërat, uria dhe shkatërrimi i mjedisit mund të kapërcehen vetëm përmes bashkëpunimit."

Zgjidhja e sfidave globale vetëm përmes bashkëpunimit: siç dihet, Presidenti i SHBA-së, Donald Trump, ka një mendim krejt tjetër. Ai nuk e fsheh përbuzjen për Kombet e Bashkuara, edhe pse selia e OKB-së ndodhet në qytetin e tij të lindjes, Nju Jork.

UNDP: 22.000 punonjës në 170 vende

Programi i Kombeve të Bashkuara për Zhvillim është një rrjet shumë kompleks me rreth 22.000 punonjës, shumica dërrmuese e të cilëve janë të shpërndarë në mbarë globin, në rreth 170 vende. Qëllimi është të luftohet varfëria, të sigurohet qasja në energji dhe ujë të pastër, të përmirësohet arsimi dhe të mbrohet klima. Dhe, diçka që është veçanërisht e rëndësishme në këto kohë: të hapet rruga për demokracinë në vendet autoritare, të arrihet lidhja e vendeve më të varfra me ato më të pasura. Dhe gjithmonë bëhet fjalë edhe për bashkëpunim, për shembull në transferimin e njohurive teknike nga Veriu i pasur në Jug.

Gjermania është aktualisht donatori më i madh

Kjo organizatë ekziston që nga viti 1965 dhe drejtori i saj deri në vitin 2025 ishte gjermano-braziliani Achim Steiner. Një pikë e dobët e përhershme e UNDP-së (ashtu si me organizata të tjera të OKB-së) është se ajo financohet ekskluzivisht nga kontributet vullnetare të shteteve anëtare të OKB-së, të cilat së fundi arritën në rreth 5.6 miliardë euro.

Gjermania është aktualisht donatori më i madh, ndërsa Donald Trump ka njoftuar qëllimin për t'u tërhequr nga shumë organizata të rëndësishme të OKB-së.

Boni: nga kryeqytet në selinë e Kombeve të Bashkuara

Selia e OKB-së në Bon është një nga qendrat më të rëndësishme të Kombeve të Bashkuara në mbarë botën. Në fillim, vendosja e organizatave të OKB-së u konceptua kryesisht si kompensim për faktin që qyteti buzë Rinit humbi rolin si selia e qeverisë dhe parlamentit gjerman pas rrëzimit të Murit dhe ribashkimit: më 20 qershor 1991, Bundestagu vendosi që Berlini të ishte në të ardhmen kryeqyteti i Gjermanisë, që vendi të qeverisej prej aty dhe që parlamenti të kishte selinë në ndërtesën e mëparshme të Reichstagut.

Por tatëpjeta e qytetit, për të cilën patën frikë shumë banorë të Bonit, nuk ndodhi. Në Bonn ka ende shumë punonjës të qeverisë federale, dhe ky qytet tani është strehë e 27 institucioneve të OKB-së me rreth 1.200 punonjës. Tani do të shtohen edhe 300 vende pune të tjera.

Dëshira për më shumë pushtet gjerman në OKB

Rritja e ndikimit gjerman në Kombet e Bashkuara ishte gjithashtu një nga temat e diskutimit gjatë udhëtimit të fundit të ministrit gjerman të Jashtëm, Johann Wadephul, në Shtetet e Bashkuara javën e kaluar. Pas një takimi me Sekretarin e Përgjithshëm të OKB-së, António Guterres, në Nju Jork, diplomati më i lartë gjerman tha se Gjermania do të mbetej e përkushtuar ndaj OKB-së, edhe nëse nuk plotësoheshin të gjitha dëshirat e saj, por se "përfaqësimi gjerman në Kombet e Bashkuara nuk është i mjaftueshëm" dhe nuk i është i drejtë për peshën dhe rëndësinë e Gjermanisë. "Për të ardhmen duhet të jetë e qartë: Gjermania dëshiron të ketë vendin e saj në tryezën e Kombeve të Bashkuara."

Ka qenë prej kohësh e qartë se qeveria e re federale, e përbërë nga konservatorët dhe socialdemokratët, dëshiron të kandidojë për një nga vendet jo-të përhershme në Këshillin e Sigurimit me ndikim të OKB-së, duke vazhduar kështu një nismë të qeverisë së mëparshme. Numri i madh i punonjësve të rinj të OKB-së në Rin përshtatet mirë me këtë tablo. /DW