Ylli i Manchester United, Bruno Fernandes, ka deklaruar në mënyrë sensacionale se do të ishte i hapur për një transferim në Spanjë, Itali dhe Portugali.

Portugezi theksoi se prioriteti i tij është të qëndrojë te United, por vetëm nëse klubi e bën të ndihet i dëshiruar.

Ai pranoi më herët gjatë kësaj jave se ishte lënduar kur kuptoi se klubi donte ta shiste, pasi skuadra e Arabisë Saudite, Al-Hilal, kishte bërë një ofertë shumë të madhe verën e kaluar.

Fernandes e refuzoi këtë lëvizje sepse e do Manchester Unitedin. Megjithatë, komentet e tij të mërkurën kanë hedhur dyshime serioze mbi të ardhmen e tij në klub.

Në një intervistë për Canal 11, ai u shpreh: “Dua të qëndroj te Manchester United për aq kohë sa ndihem i dëshiruar.”

“Do të doja ta përjetoja kampionatin spanjoll dhe të luftoja për tituj të mëdhenj në Itali. Kam shumë lidhje me Italinë. Vajza ime ka lindur atje.”

“Kam menduar tashmë për një rikthim në Portugali. Opsioni i parë do të ishte Sporting. Që të jem i lumtur, siç isha me Sportingun, por nuk dua ta prish imazhin që ka mbetur.”

“Nuk dua të shkoj atje thjesht sa për të qenë, dua të shtoj diçka.”

“Madje edhe të provoj futbollin e distriktit, në një moshë më të shtyrë. Aty luan për dashuri, ndihesh ndryshe. Kam miq në futbollin e distriktit.”

Fernandes është transferimi më i mirë i epokës pas Sir Alex Fergusonit. Ai ka realizuar 103 gola dhe ka dhënë 93 asistime në 307 paraqitje në të gjitha garat.

31-vjeçari ka qenë pjesë kyçe e skuadrës së Ruben Amorimit këtë sezon.

Ai i ka nisur si titullar të gjitha 16 ndeshjet e Premier League këtë edicion, duke shënuar pesë gola dhe shtatë asistime.

Megjithatë, pas deklaratave të tij të fundit, ka dyshime për të ardhmen e tij. Hierarkia e klubit mund të mos jetë e kënaqur me këto komente dhe mund të shqyrtojë shitjen e tij verën e ardhshme.

Duke pasur parasysh cilësinë dhe përvojën e tij në nivelin më të lartë, pritet të ketë interes të madh për shërbimet e tij.