Menaxheri i kombëtares italiane, Gigi Buffon, ka konfirmuar se Gennaro Gattuso do të emërohet si trajneri i ri i "Azzurrëve", duke theksuar se: “E kemi marrë vendimin më të mirë të mundshëm.”
Italia mbeti pa trajner pas shkarkimit të Luciano Spallettit, pas humbjes 3-0 ndaj Norvegjisë, ndonëse ai e udhëhoqi skuadrën edhe në fitoren 2-0 ndaj të njëjtit kundërshtar pak ditë më vonë.
“Kemi punuar, tani po presim vetëm disa detaje të fundit,” tha Buffon për RAI Sport.
“Presidenti dhe Federata kanë pasur disa ditë mjaft intensive me shumë zhvillime. Në fund të ditës, besoj se kemi marrë vendimin më të mirë të mundshëm.”
Fillimisht, zgjedhja kryesore ishte Claudio Ranieri, por ai tashmë kishte marrë një rol si këshilltar special te Roma dhe kishte shpallur tërheqjen nga trajnimi aktiv.
Ndër kandidatët e përmendur ishin edhe Stefano Pioli, Daniele De Rossi dhe Fabio Cannavaro, por shumë shpejt u bë e qartë se Gattuso ishte favoriti kryesor.
Për të konkretizuar marrëveshjen, pati takime mes Gattusos dhe Buffonit, si dhe me presidentin e FIGC, Gabriele Gravina.
“Po përpiqemi të japim më të mirën tonë, por mbi të gjitha, është e rëndësishme të shmangim paraqitje turpëruese që nuk i shkojnë Italisë,” shtoi Buffon.
“Ka mënyra të ndryshme për të humbur, dhe mendoj se me disa rregullime të vogla mund të shmangim më të keqen.”
Italia rikthehet në fushë për kualifikimet e Kupës së Botës 2026, ku do të përballet me Estoninë më 5 shtator dhe më pas me Izraelin më 8 shtator.
