Merkatoja e transferimeve po nxehet dhe emri i yllit të kombëtares së Kosoves, Fisnik Asllanit është shënuar me të kuqe në agjendat e drejtorëve më të mëdhenj sportivë në Evropë.

Sulmuesi është kthyer në objekt dëshire për elitën evropiane. Megjithatë, mes ofertave dhe interesimit të gjigantëve të kontinentit, Barcelona ka një avantazh emocional që mund të jetë vendimtar.

Siç ka zbuluar portali gjerman “Fussballdaten”, lojtari 23-vjeçar e ka të qartë prioritetin e tij.

Pasi u shpall golashënuesi më i mirë gjatë periudhës së tij te SV Elversberg në Bundesliga 2 dhe u konsolidua si një nga premtimet e mëdha të Bundesligës, Asllani vendos klubin blaugrana në krye të listës mes skuadrave që e dëshirojnë.

Ai e bëri të qartë këtë në një intervistë për “Sport Bild” në muajin tetor, ku deklaroi: “Klubi i ëndrrave të mia ka qenë gjithmonë Barcelona, gjithmonë kam dashur të luaj atje. Do të doja të luaja një ditë në Ligën e Kampionëve. Është e rëndësishme të kesh ëndrra dhe të punosh fort për t’i arritur ato.”

Kjo deklaratë publike dashurie e vendos Decon dhe Hansi Flick në një pozicion të favorshëm për të negociuar për atë që mund të jetë zëvendësuesi i Robert Lewandowski, por ata nuk mund të qetësohen, pasi konkurrenca për kosovarin është e ashpër.

Barça është destinacioni i ëndrrave, por talenti i Asllanit ka zgjuar interesin e shumë pretenduesve që janë të gatshëm t’i ofrojnë kushte më të mira. Zërat në Angli dhe Gjermani po shtohen dhe portali gjerman përmend një listë rivalësh mbresëlënëse.

Premierliga e dëshiron dhe fuqia ekonomike angleze tashmë është në lëvizje.

Chelsea e ka në listën e prioriteteve. Tottenham Hotspur dhe Aston Villa kanë dërguar emisare për ta ndjekur nga afër. Ata e shohin si prototipin perfekt të sulmuesit modern dhe nuk do të kishin problem të vendosnin paratë në tavolinë për ta siguruar sa më shpejt.

Siç është tradita, Bayern Munich nuk dëshiron të lërë të ikë një talent të formuar në Gjermani dhe po e monitoron nga afër progresin e tij.

Atyre u shtohet edhe Borussia Dortmund, gjithmonë i vëmendshëm për të kapur talentet e reja të kampionatit.

Hoffenheim veproi shpejt duke ia rinovuar kontratën deri në vitin 2029, me qëndrimin klasik zyrtar se lojtari “nuk është në shitje”.

Megjithatë, realiteti i tregut është tjetër: kontrata e tij përfshin një klauzolë lirimi prej 30 milionë eurosh.

Tetë golat dhe pesë asistimet në 25 ndeshje e mbështesin, dhe duke marrë parasysh se vlera e tij në treg është rritur në mënyrë meteorike gjatë vitit të fundit (nga 1.2 në 30 milionë euro, sipas Transfermarkt), në Gjermani kjo shumë po konsiderohet si “bixhozi i merkatos”.

Një shifër që, ndonëse e përballueshme për gjigantët anglezë, do ta detyrojë Barcelona të bëjë inxhinieri financiare nëse dëshiron të realizojë ëndrrën e lojtarit dhe të shmangë që sulmuesi të përfundojë me një fanellë tjetër./GazetaExpress/