Presidenti i SHBA-së, Donald Trump, deklaroi të martën se Alex Pretti, burri që u qëllua për vdekje nga një agjent federal gjatë një përballjeje në Minneapolis, nuk do të duhej të kishte mbajtur armë, duke u distancuar nga qëndrimet e grupeve për të drejtat e armëve dhe disa republikanëve.

I pyetur nëse pajtohej me zyrtarë të administratës që e kanë cilësuar Prettin si terrorist të brendshëm, Trump tha: “Nuk kam dëgjuar për këtë, por sigurisht që nuk do të duhej të kishte mbajtur armë.”

Duke folur me gazetarët në një restorant në Ajova, Trump shtoi: “Ai kishte një armë. Nuk më pëlqen kjo. Ai kishte dy karikatorë plotësisht të mbushur. Kjo është gjë e keqe. Dhe pavarësisht kësaj, do të thosha se kjo është… shumë fatkeqe.”

Pretti, mbajtës i licencuar për armë të fshehur, u vra të shtunën gjatë një operacioni federal për zbatimin e ligjit të emigracionit në Minneapolis. Ngjarja ka shkaktuar kritika të gjera dhe ka çuar në ndryshime në udhëheqje të urdhëruara nga Shtëpia e Bardhë.

Grupet për të drejtat e armëve, përfshirë NRA-në dhe Gun Owners of America, reaguan duke theksuar se Pretti po mbante armën në mënyrë të ligjshme, ndërsa pamjet e shpërndara nga vendngjarja tregojnë se ai nuk e preku armën para se të qëllohej. Deklaratat e Trump kanë hapur përçarje brenda kampit republikan, në prag të zgjedhjeve afatmesme të nëntorit.