Finalja e Cincinnati Open solli përballë dy tenistët më të mirë në botë, Carlos Alcaraz dhe Jannik Sinner, të cilët po krijojnë një rivalitet të ngjashëm me atë historik të Novak Djokovic dhe Rafael Nadal.

Pas një sërë dueleve dramatike këtë vit – mes tyre edhe finalja e French Open ku Alcaraz triumfoi në pesë sete dhe fitorja e Sinner në Wimbledon – pritej një tjetër betejë e madhe. Por finalja në Cincinnati përfundoi shumë shpejt: pas vetëm 23 minutash loje, me rezultatin 5-0 për spanjollin, Sinner u detyrua të tërhiqej për shkak të problemeve shëndetësore.

“Nuk jam ndier mirë që dje. Mendova se do të përmirësohesha gjatë natës, por u bë më keq. Jam shumë i zhgënjyer që nuk munda të jap një ndeshje të denjë. I kërkoj ndjesë të gjithëve, dhe e uroj Carlos për një tjetër titull”, tha Sinner pas ndeshjes.

Shpërblimi dhe taksat e majme

Për fitoren, Alcaraz mori kupën Rockwood dhe një çek prej 1,124,380 dollarësh, që është 7.14% më shumë se viti i kaluar. Mirëpo, spanjolli nuk do t’i mbajë të gjitha paratë.

Sipas ligjeve të tatimit në SHBA, 37% e shumës i kalon qeverisë amerikane, çka do të thotë se Alcaraz do të humbë rreth 416,020 dollarë nga fitimi i tij. Përveç kësaj, pasi ai është rezident në Murcia të Spanjës, i duhet të paguajë edhe tatime shtesë shtetërore dhe rajonale që arrijnë deri në 46%, megjithëse marrëveshja fiskale mes SHBA-së dhe Spanjës e mbron nga tatimi i dyfishtë.

Ndërkohë, rivali i tij Sinner, që banon në Monako – një vend pa tatime mbi të ardhurat – nuk përballet me këtë problem, dhe fitimet e tij mbeten të paprekura nga shteti.

Çfarë vjen më pas?

Pas këtij titulli, të gjithë sytë janë drejt US Open, por Sinner është një dyshim i madh për të marrë pjesë, pasi shëndeti i tij mbetet në pikëpyetje.

Nëse mungon, kjo do t’i hapte rrugën Alcaraz për një tjetër triumf madhor dhe ndoshta për të marrë edhe fronin e tenisit botëror pa rivalin e tij më të madh. /GazetaExpress/