Ylli i Real Madridit, Dani Carvajal, ka mbrojtur futbollistin e Barcelonës, Lamine Yamal, nga kritikat në media, duke theksuar se ai tashmë ka mjaft ngarkesë mbi supe. Ai gjithashtu foli edhe për vështirësinë e gjykimit, kur u pyet për disa vendime kontroverse gjatë tri javëve të para të kampionatit.
Lamine Yamal është kritikuar shumë këtë verë për sjelljet jashtë fushe, ndërsa në fillim të sezonit është akuzuar edhe për arrogancë në fushë. Megjithatë, Carvajal theksoi se ai meriton mirëkuptim.
“Njerëzit duhet ta kuptojnë që është e ndërlikuar. Ai është një djalosh 18-vjeçar që tashmë është lojtar kyç te Barcelona, një nga klubet më të mira në botë. Ai po bën diferencën, ka nënshkruar një kontratë të rëndësishme, ndikimi i tij është rritur jashtëzakonisht, dhe në fund nuk është e lehtë të menaxhohet kjo,” tha Carvajal për Cadena SER.
“Ai do të bëjë gabime, ashtu si të gjithë ne. Por, në fund të ditës, nëse jep maksimumin në fushë, jep gjithçka dhe ka cilësinë që ai ka – e cila është e padiskutueshme – atëherë ai mund të bëhet një lojtar që lë gjurmë në një epokë.”
Carvajal megjithatë refuzoi të futej në debatin për Topin e Artë, duke kujtuar edhe sulmet online – disa prej tyre me bazë raciste – që shokët e tij të skuadrës, si David Alaba, kanë marrë për zgjedhjet e tyre kur nuk kanë votuar për kandidatët e Real Madridit.
“Ai mund të jetë kandidat për Topin e Artë, sidomos për shkak të moshës së tij. Në fund, mos harrojmë që ai është 18 vjeç, dhe unë në atë moshë isha ende te Castilla. Është shumë e vështirë të bësh diferencën në atë moshë në futbollin profesionist. Për sa i përket votës, unë nuk do t’ia jap askujt, sepse nuk jam kapiten, ndaj jam i përjashtuar nga kjo,” përfundoi Carvajal.
