Çdo lider i ri i emëruar nga klerikët sundues të Iranit do të ishte “një objektiv i qartë për eliminim”, paralajmëroi Izraeli të mërkurën, ndërsa zyrtarët e lartë iranianë mblidhen për të zgjedhur një pasardhës të Ajatollah Ali Khameneit të ndjerë, raporton CNN.

“Çdo lider i emëruar nga regjimi terrorist iranian do të jetë një objektiv i qartë për eliminim – Kryeministri dhe unë kemi udhëzuar IDF-në të përgatitet dhe të veprojë me të gjitha mjetet e nevojshme për të përmbushur misionin si pjesë integrale e objektivave të Operacionit ‘Lion’s Roar’”, tha ministri izraelit i Mbrojtjes, Israel Katz.

“Nuk ka rëndësi si quhet apo ku fshihet”, tha Katz.

“Ne do të vazhdojmë të veprojmë me forcë të plotë, së bashku me partnerët tanë amerikanë, për të çmontuar kapacitetet e regjimit dhe për të krijuar kushtet që populli iranian ta rrëzojë atë dhe ta zëvendësojë”.

Një organ i zgjedhur i klerikëve të lartë është mbledhur virtualisht për ta përzgjedhur një Udhëheqës të ri Suprem pasi Khamenei u vra në sulmet fillestare SHBA-Izrael të shtunën. Khamenei nuk la një pasardhës të shpallur zyrtarisht.

Si Izraeli ashtu edhe SHBA-ja kanë pretenduar se sulmet e tyre do të krijonin kushtet që populli iranian të vendosë një qeveri demokratike dhe ta rikthejë paqen në rajon. Në të njëjtën kohë, presidenti amerikan Donald Trump ka përmendur një rezultat të ngjashëm me Venezuelën – ku forcat amerikane kapën presidentin, por lanë në vend një pjesë të madhe të administratës.