Shefi i GP të AKK-së Besnik Tahiri, ka thënë se VV-ja me çështjen e presidenti është duke krijuar një  krizë të cilën me vetëdije apo pa vetëdije, dëshirojnë ta dërgojë vendin në zgjedhje,

“Fillimisht, ora është tash 3 e 25, ende asnjë grup parlamentar nuk ka marrë asnjë informacion se a do të mbahet seanca për zgjedhjen e presidentit, përderisa kanë mbetur edhe një ditë. Qytetarët e Kosovës duhet ta dinë se përgjegjësia për zgjedhjen e presidentit fillimisht i takon partisë parlamentare që i ka fituar 51 për qind. Për këtë 51 për qindësh, për këto 66 vota e ka marrë qeverinë me 19 ministri dhe ata janë tash në punë. Nuk i ka 80 vota me bë presidentin dhe në mungesë të 80 votave, nuk ka ndodhë një proces politik për të zgjedhur një kandidat konsensual”, tha ai.

Ai pati kritika edhe për gjithçka që ka dalë nga bisedimet e takimeve që Kurti zhvilloi me Hamzën dhe Abdixhikun, duke thënë se para mediave kishte deklarata të ndryshme nga secili vec e vec.

“Pse s’ka ndodh? Ne kemi ditë kur është afati i fundit kohor. Dhe nuk ka ndodhë asnjë tryezë politike serioze për me e diskutuar profilin e një kandidati potencial për president konsensual, për vendosjen e emrave të subjekteve politike dhe pastaj për dakordimin e dy apo tre emrave të cilat kanë mujtë me shku në votim. Kjo nuk ka ndodh. Kanë ndodh disa takime që kanë qenë siç e keni parë një-me-një, në mënyrë jo transparente, pa llogaridhënie politike. Diskutimi dhe prezantimi para mediave ka qenë i ndryshëm i Kryeministrit Kurti, i liderëve të partive që kanë folë, dhe sot jemi në një krizë serioze të shtetit të Kosovës”, tha ai.

Ai madje tha se dërgimi në zgjedhje, po bëhet me vetëdije apo pa vetëdije të LVV-së.

“Një krizë të cilën me vetëdije apo pa vetëdije, shumica parlamentare don ta dërgojë vendin në zgjedhje. Ky eksperimentim nuk është duke ardhur vetëm si rezultat i një qëndrimi politik, por i një eksperimentimi të skajshëm të afateve kohore, të cilat ne si Aleancë për Ardhmërinë e Kosovës i kemi adresuar me 21 janar në një letër që i kemi dërguar kryetarit të PDK-së dhe kryetarit të LDK-së, ku kemi paraparë një situatë ku do të diktohet një agjendë dhe ku do të vijmë në një situatë që kemi ardhur sot”, tha ai.

“Mungesa e procesit politik për t’i dhënë Kosovës një president apo presidente i faturohet vetëm një identiteti, vetëm një partie politike. Ajo është partia që i ka fitu zgjedhjet, që edhe deri sa po flasim nuk e ka vendosë një emër, nuk e ka vendosë një numër të kandidatëve, po rri e mban në amulli një shtet, një Kosovë. Kudo që të ecim në rrugë, sa herë që të vij unë si kryetar i grupit parlamentar këndej, pyetja e parë që e kam: “Allahile Besnik, çka po bëhet?”. E unë po ju them çka po bëhet. Është një puç që po i instalohet Kosovës përmes një papërgjegjësie të plotë politike, të një shumicë parlamentare e cila synimin e vetëm e ka që të zaptojë institucionin e  Presidentit të Kosovës dhe në tri institucione të mos ketë llogaridhënie por llogaridhënia të jetë në një vend, në një parit. Kjo situatë duhet të tejkalohet por sic shihet nuk ka vullnet. Kjo situatë duhet të tejkalohet, por siç shihet nuk ka vullnet dhe shihet se do të vihet në një situatë ku tendencat janë të qarta, ku një mosmarrëveshje, një ngërç politik dëshiron të kthehet në një interpretim kushtetues, vetëm që të zvarritet procesi. Kjo duhet të ndalet, ky vend ka dhënë shumë për me ardh në këtë liri dhe shtetësi, kemi pasë shumë vuajtje dhe me ardh në këtë derexhe. AAK nuk ka qenë e përfshirë në konsultime, por gjithmonë kemi qenë të hapur të diskutojmë sesi të dalim nga kjo ”, tha ai.