Liverpooli është eliminuar nga FA Cup, pas humbjes 2:0 kundër Chelseat në 1/8 e finales të martën në Londër. Chelsea, ndërkohë, e ka siguruar një vend në çerekfinale.

Willian dhe Ross Barkley i shënuan dy golat e triumfit në Stamfrord Bridge për skuadrën e Frank Lampard, duke i thelluar të kuqtë në një krizë rezultatesh, raporton Gazeta Express.

Kjo ishte humbja e tretë në katër ndeshjet e fundit për skuadrën e Jurgen Klopp, e cila është edhe më e rëndë duke ditur se i ka kushtuar asaj me humbjen e mundësisë për ta fituar këtë trofe.

Anësori brazilian Willian i kaloi të kaltrit në epërsi në minutën e 13-të, falë një gabimi trashanik të Fabinhos, i cili ia pasoi topin atij në vijë të zonës së vet, dhe portierit Adrien, i cili e pati në duar topin e goditur nga ai por nuk mundi ta ndalë.

Barkley me një kundërsulm të shpejtë në minutën e 64-të, e dyfishoi epërsinë e Chelseat duke e bombarduar portën e të kuqve.

Skuadra e Klopp nuk e pati asnjë goditje në kornizën e portës në pjesën e dytë, duke i thënë lamtumirë kësaj gare në mënyrën zhgënjyese.

Kjo disfatë e Liverpoolit vjen pas humbjes tronditëse 3:0 nga Watfordi në Premierligë, i cili ia shkaktoi humbjen e parë në ligë këtë sezon dhe ia shoi shpresat për t’u shpallur kampion pa pësuar asnjë disfatë.

Liverpooli rrezikon të eliminohet edhe nga Liga e Kampionëve, pasi e humbi ndeshjen e parë 1:0 nga Atletico Madridi në udhëtim, dhe të mbetet me vetëm një trofe në një sezon që duhej të ishte i begatshëm me plot trofe. /Gazeta Express/