Chelsea mund ta ketë marrë tashmë vendimin lidhur me shkarkimin e Liam Rosenior pas humbjes së rëndë 3-0 ndaj Everton.

Të shtunën pasdite, Chelsea kishte një mundësi të artë për të rritur ndjeshëm shanset për kualifikim në Ligën e Kampionëve gjatë përballjes në Premierligë kundër Evertonit.

Pas humbjes së Liverpoolit ndaj Brightonit më herët gjatë ditës, një fitore në “Hill Dickinson Stadium” do ta çonte Chelsean në vendin e katërt me vetëm shtatë ndeshje të mbetura.

Megjithatë, një paraqitje e dobët bëri që londinezët të pësonin humbje 3-0, me dy gola nga Beto dhe një nga Iliman Ndiaye.

Pas këtij rezultati, shumë tifozë kanë kërkuar largimin e Roseniorit vetëm disa muaj pasi ai zëvendësoi Enzo Maresca në fillim të vitit.

Megjithatë, sipas raportimeve, kjo çështje nuk është fare në diskutim aktualisht te Chelsea, pasi drejtuesit e klubit vazhdojnë ta mbështesin plotësisht trajnerin e tyre.

Raporti thekson se emërimi i Roseniorit – i cili ka kontratë deri në vitin 2032 – nuk ishte pjesë e planit fillestar të klubit për këtë sezon.

Por përplasja publike dhe dramatike mes Marescas dhe bordit në janar i detyroi drejtuesit të vepronin, duke i dhënë Roseniorit një detyrë të vështirë për të rikthyer ekipin në rrugën e duhur.

Për shkak të këtyre rrethanave, drejtuesit janë të vetëdijshëm për sfidat me të cilat është përballur ai, si në implementimin e ideve taktike ashtu edhe në menaxhimin e një skuadre të ndërtuar nga një trajner tjetër.

Prandaj, në vend që të reagojnë me panik pas katër humbjeve radhazi, Chelsea pritet të vazhdojë me Roseniorin në të ardhmen e afërt, ndërsa një shkarkim para sezonit të ardhshëm konsiderohet i pamundur.

Në vend të kësaj, klubi dëshiron të shohë se si do të performojë ai pasi të ketë në dispozicion një fazë të plotë përgatitore, me drejtuesit që besojnë se është zgjedhja e duhur për afatgjatë.

Edhe vetë Roseniori duket i vetëdijshëm se i duhet kohë për t’u përshtatur dhe për të zbatuar vizionin e tij.

Pas humbjes ndaj Evertonit, ai pranoi se ende po mëson për klubin, por mbetet i bindur në potencialin e skuadrës së tij pavarësisht rezultateve të dobëta.

“Po mësoj për këtë klub. Është një klub i madh. Ka pasur shumë zhurmë, shumë zhurmë negative – me të drejtë, për shkak të paraqitjeve tona javën e fundit.

Kemi zhvilluar 10 ndeshje së bashku në kampionat si grup. Kemi marrë 17 pikë. Mendoj se në kohën time jemi të katërt. Duhet ta harrojmë zhurmën dhe të ruajmë besimin dhe qetësinë”, e mbylli ai./GazetaExpress/