Edhe pse Real Madrid ka pasur një verë të ngarkuar me katër afrime me vlerë totale 167.5 milionë euro, një pozicion vazhdon të shkaktojë debat në kryeqytetin spanjoll.

Largimet e Toni Kroos dhe Luka Modric nuk janë pasuar me një mesfushor kontrollues, ndërsa thuhet se trajneri i ri, Xabi Alonso, e dëshiron shumë një lojtar të tillë.

Megjithatë, drejtuesit e klubit janë më pak të bindur. Presidenti Florentino Perez nuk ka ndërmend të shpenzojë shumë për një mesfushor këtë verë, përveçse nëse beson se ai vlen me të vërtetë. Deri tani, i vetmi lojtar që e ka bindur për ta bërë këtë është Rodri Hernandez i Manchester City-t. Por duke pasur parasysh dëmtimin afatgjatë dhe moshën 29-vjeçare, një marrëveshje e shtrenjtë duket më pak e mundshme.

Kontrata aktuale e Rodr-it skadon në vitin 2027, dhe Los Blancos mund të tundohen ta rikthejnë madrilenin atëherë. Pas një viti, nëse nuk ka rinovuar, ai mund të jetë i disponueshëm me një çmim më të ulët, ndërkohë që Real Madrid do të ketë prova të mjaftueshme për rikuperimin e tij nga dëmtimi i ligamentit të kryqëzuar.

Gjithsesi, City nuk ka ndërmend ta lëshojë lehtë. Sipas Fabrizio Romano, klubi anglez do t’i ofrojë Rodr-it një kontratë të re katërvjeçare deri në vitin 2029, duke e bërë lojtarin e dytë më të paguar pas Erling Haaland. Kjo do ta çonte atë deri në moshën 33-vjeçare, një marrëveshje afatgjatë që rrallë u ofrohet lojtarëve mbi këtë moshë.

Mbetet për t’u parë nëse Real Madrid do të ishte i gatshëm ta nënshkruajë Rodr-in verën e ardhshme. Klubi ka një politikë që lojtarëve mbi 30 vjeç u ofron vetëm rinovime njëvjeçare, ndërsa ylli spanjoll me shumë gjasë do të kërkonte të paktën një kontratë trevjeçare nëse kalon te madrilenët. Emrat e Enzo Fernandez dhe Alexis Mac Allister janë gjithashtu në listën e preferencave të klubit për këtë rol, por të dy janë konsideruar shumë të kushtueshëm për këtë verë./GazetaExpress/