Kryeministri i Mbretërisë së Bashkuar, Keir Starmer, tha se është “jetike” ta ndërtojnë një “marrëdhënie më e sofistikuar” me Kinën, teksa ai kreu vizitën e parë të një udhëheqësi britanik në këtë vend pas tetë vitesh, raporton CNN.

Udhëtimi katërditor i Starmer vjen ndërsa ai synon t'i riparojë lidhjet e tendosura me ekonominë e dytë më të madhe në botë, përballë tensioneve globale të shkaktuara nga aleati më i afërt i Britanisë, Shtetet e Bashkuara.

“Kina është një aktor jetik në skenën globale, dhe është jetike që ne të ndërtojmë një marrëdhënie më të sofistikuar”, i tha Starmer udhëheqësit kinez Xi Jinping gjatë një takimi në Sallën e Madhe të Popullit në Pekin, të enjten.

“Partneritetet tona ndërkombëtare na ndihmojnë të ofrojmë sigurinë dhe prosperitetin që meritojnë njerëzit britanikë, dhe kjo është arsyeja pse prej kohësh kam qenë i qartë se Mbretëria e Bashkuar dhe Kina kanë nevojë për një partneritet strategjik afatgjatë, të qëndrueshëm dhe gjithëpërfshirës”, tha ai.

Udhëheqësi kinez Xi Jinping tha gjithashtu se Kina ishte e gatshme të zhvillonte një “partneritet strategjik të qëndrueshëm dhe gjithëpërfshirës” në komentet drejtuar udhëheqësit vizitor dhe bëri thirrje që të dyja palët ta “krijojnë një vrull të ri” në marrëdhëniet e tyre.

Starmer është i fundit në një varg udhëheqësish nga vendet aleate të SHBA-së që po udhëtojnë drejt Pekinit, teksa kërcënimet e tarifave nga presidenti amerikan Donald Trump dhe politika e tij e paparashikueshme e jashtme – përfshirë retorikën më herët këtë muaj që kërcënonte marrjen nën kontroll të territorit danez të Grenlandës – po përmbysin partneritetet e kahershme të Amerikës.

Vizita është gjithashtu një hap kyç në përpjekjen e Starmer për ta rivendosur një marrëdhënie që vitet e fundit ka qenë e mbushur me mosbesim dhe fërkime – pjesë e shtysës së tij më të gjerë për të zgjeruar mundësitë e biznesit me Kinën dhe për të realizuar rritjen ekonomike.

Duke folur me gazetarët pas takimit me Xi, Starmer e cilësoi takimin si “shumë të mirë, konstruktiv, me rezultate reale” dhe theksoi “mundësitë e mëdha” për biznesin britanik në Kinë. Ai e përshkroi gjithashtu marrëdhënien me Pekinin si në një “gjendje të mirë, një gjendje të fortë”.

Ai tha se të dyja palët bënë “disa përparime vërtet të mira” në uljen e tarifave të Kinës për uiskin dhe në udhëtimin pa viza drejt Kinës, ndonëse vuri në dukje se detajet janë ende në diskutim.

“Ato janë shembuj të një hapjeje shumë më të gjerë të aksesit për biznesin, për të cilën diskutuam gjatë”, shtoi Starmer.

Një delegacion prej afro 60 biznesesh dhe grupesh kulturore po udhëton si pjesë e delegacionit të Starmer, përfshirë gjigantë korporativë britanikë si HSBC, GSK dhe Jaguar Land Rover. Grupi pritet gjithashtu të vizitojë kryeqytetin financiar të Kinës, Shangain.