Duket e çuditshme por shumë ekipe përfaqësuese janë duke ndryshuar trajner parak muaj para fillimit të Botërorit, edhe pse kanë siguruar pjesëmarrjen falë tyre në aktivitetet në fjalë.
Ganës i mjaftuan disfatat në miqësore te marsit për të shkarkuar trajnerin Oto Ado, e tashmë duket se të njëjtin shembull do të ndjekë edhe Arabia Saudite me francezin Herve Renar. Ky i fundit i drejtoi në rrugëtimin që siguroi biletën për Botërorin, ashtu si katër vite më parë ku u bënë protagonistë në Katar 2022 teksa mundën Argjentinën në grupe.
Por në shtypin saudit bëjnë të ditur se ai është pranë shkarkimit, pasi ekipi nuk bind me paraqitjet e tij, ndërsa në skuadër pritet të afrohet Ualid Regragui, trajneri i cili u shkarkua nga Maroku një muaj më parë.
Megjithatë, Renar nuk do të mbetet mes katër rrugësh, pasi “L’Equipe” bën të ditur se parashikohet që të marrë drejtimin e një tjetër ekipi pjesëmarrës në Botëror, pikërisht Ganës që ka mbetur pa trajner. Nuk do të ishte hera e parë për Renar, pasi ai kishte nisur eksperiencën e tij në pankinë pikërisht te Gana, si zëvendëstrajner i Klod Le Rua në vitet 2007-2008.
