Ministri në detyrë i Zhvillimit Rajonal, Fikrim Damka, ka deklaruar se është duke e ndjekur procesin e rinumërimit.

Ai ka thënë se vullneti i popullit nuk është i hapur për ndërhyrje pasi të mbyllet kutia e votimit.

Nga procesi i rinumërimit i zhvilluar deri tash, Damka ka mbetur jashtë Kuvendit pasi i janë hequr 92 vota të cilat i ishin përshkruar rrejshëm.

Tutje Damka ka thënë se së fundmi sulmet e fundit ndaj tij kanë për qëllim t’ia zbehin arritjet e deritashme.

“Çdo votë është një shenjë e prekshme e besimit, përpjekjes dhe djersës që populli ynë ka derdhur për ne. Së fundmi, sulmet dhe pretendimet e pabazuara që më synojnë mua kanë vetëm një qëllim: të errësojnë arritjet e fituara dhe të minojnë vullnetin tonë shoqëror. Ne jemi gjithmonë të hapur ndaj çdo kritike konstruktive dhe me qëllim të mirë; megjithatë, është e pamundur që të na devijojnë këto atentate ndaj reputacionit, të kryera me qëllime të pista. E vërteta do të zërë vend si në ndërgjegjen e popullit, ashtu edhe përpara ligjit”, ka thënë ai.

Ka shtuar se Partia Demokratike Turke e Kosovës do të përfaqësohet sërish në parlament me dy deputetë.

“Askush të mos ketë dyshim se Partia Demokratike Turke e Kosovës (KDTP) do të përfaqësohet sërish në parlament dhe në komuna me dy deputetë; ne do të vazhdojmë rrugëtimin tonë me vendosmëri, nën udhëheqjen time si Kryetar i Përgjithshëm, së bashku me të gjitha degët tona. Me forcën institucionale të partisë sonë, me përpjekjen e organizatave tona në terren dhe me sakrificën e kolegëve tanë, do të vazhdojmë të ruajmë si përfaqësimin tonë në Parlament, ashtu edhe pozitën tonë të fortë për popullin tonë. Duke e forcuar edhe më tej KDTP-në, marr përsipër përgjegjësinë për ta çuar atë drejt së ardhmes, në unitet dhe solidaritet, me të njëjtën vendosmëri.  Pavarësisht rezultatit zgjedhor, ne kurrë nuk do të heqim dorë nga vullneti ynë për t’i shërbyer popullit tonë”, ka thënë ai.