Real Madridi mund të përballet me një tjetër mungesë të rëndësishme në vijim të fazës së grupeve në Kupën e Botës për Klube.
Mbrojtësi i djathtë Dani Carvajal, sipas raportimeve nga Marca, po përballet me shqetësime në qafë dhe aktualisht nuk është duke u stërvitur me grupin.
Ky problem fizik vjen në një moment kritik për “Los Blancos”, që tashmë kanë nisur garën në Grupin H të këtij turneu, së bashku me Al-Hilal, Pachuca dhe Salzburg.
Carvajal kishte shprehur optimizëm për rikthimin e tij në kohë për turneun, por simptomat që po e shqetësojnë në qafë kanë bërë që stafi mjekësor të ndërhyjë me kujdes për të shmangur komplikime të mëtejshme.
Real Madridi e nisi aventurën e tij në Kupën e Botës për Klube me një barazim zhgënjyes 1–1 ndaj Al-Hilal më 18 qershor, nën drejtimin e trajnerit të ri, Xabi Alonso.
Sfida e radhës për skuadrën është më 22 qershor ndaj Pachuca, ndërsa më 27 qershor do të përballet me Salzburg në një ndeshje që mund të jetë vendimtare për kualifikimin.
