Daniel Lekndreaj është përforcimi më i ri Vëllaznimit.

Klubi gjakovar ka njoftuar zyrtarisht këtë të martë për arritjen e marrëveshjes me reprezentuesin shqiptar, i cili gjithashtu ka edhe nënshtetësi kosovare, shkruan Gazeta Express.

Lekndreaj ishte rikthyer te Sigal Prishtin në fillim të këtij sezoni, por që nuk regjistroi asnjë paraqitje shkaku i lëndimit.

Gjithsesi, basketbollisti shkodran do të jetë i gatshëm për të ndihmuar Vëllaznimin nga janari i vitit të ardhshëm.

Përveç te Prishtina, 26-vjeçari më herët ka luajtur edhe te Bashkimi e Peja.

Njoftimi i plotë nga KB Vëllaznimi (pa ndërhyrje):

“MIRËSEVJEN DANIEL LEKNDREAJ

KB Vëllaznimi ka kënaqësinë të konfirmojë edhe zyrtarisht se ka nënshkruar me superyllin vendor, Daniel Lekndreaj. Për të jetësuar këtë transferim, klubi ka punuar intensivisht në kohët e fundit duke plotësuar dëshirën e lojtarit, e cila përputhet me vizionin e klubit tonë, duke qenë prej klubeve më të organizuara në vend.

Daniel Lekndreaj njihet si lojtar me shpirt luftarak, një forcë e papërballueshme për kundërshtarët në fazën e mbrojtjes dhe mjaft agresiv në fazën sulmuese. Ai posedon një set të gjerë të shkathtësive basketbollistike dhe loja e tij multi-dimensionale do të mbush atë që na mungoi në disa reparte.

Lojtari jonë më i ri ka një mesatare të karrierës prej 11.6 pikësh, 8.9 kërcimesh, 2.7 asistimesh, 1.2 topash të vjedhur e 0.4 ballokadash.

Ai është 26 vjeçar dhe është i gjatë 192 cm. Lekndreaj mund të luajë në disa pozita combo si 4 (PF) ashtu edhe 3 (SF). Danieli dallohet për mençurinë që e karakterizon në lojën e tij.

Te Sigal Prishtina ai ka pasur mesatare sezonale prej 13.1 pikësh e 6.7 kërcimesh, te KB Peja mesatare prej 11.6 pikësh e 8.9 kërcimesh dhe përqindje prej 32.6% nga vija për tri pikë. Konsistenca e tij u dallua edhe te KB Bashkimi me 12.8 pikë, 9.1 kërcime, 2.2 asistime dhe 1.7 topa të vjedhur në hiç më pak se 29 ndeshje kampionale përgjatë gjithë sezonit 2022/2023.

Për cilësitë e tij nuk kemi dyshime, së bashku me tifozët më të mirë në botë, Kuqezinjët e Jakovës, na presin momente të mëdha të triumfit.

Mirësevjen në djepin e kulturës dhe tempullin e basketbollit kosovar, Daniel”. /Gazeta Express/